ЦIуссалакрал райондалул азарханалул хъунмур хIакин Людмила Султанова хьунабавкьунни волонтертуращал, коронавирусрал къашавай хьусса, амбулаториярттай хъин хъанай бивкIсса къашайшалтран багьайсса даруртту бачIаврил хIакъираву зунсса куц бусан. Людмила Султановал медиктуращал ва волонтертуращал сакин дунни къашайшалтрачIан даруртту биян баврил хIакъиравусса план.
ЦIуссалакрал райондалий вай масъаларттаха зунсса волонтертурал кьюкьри хIасул дурну дур Культуралул, жагьилтурал политикалул, спортрал ва туризмалул управлениялул хъунаманал хъиривчу Заур МахIаммадовлул. Шиккува кIицI лаган, волонтертуран дунни даруртту биян баврил хIакъиравусса инструктаж ва минная тIалав бунни коронавирусрал инфекциялия буруччаву мурадрайсса цинярдагу тIалавшиннарду биттур даву.
Волонтертурал кумаграйну байбивхьунни коронавирусрал къашай хьусса ва цала ичIува хъин хъанахъисса инсантурачIан даруртту биян буллай.
Амбулаториярттай хъин хъанахъисса къашайшалтрансса дарурттал кьуцуртту дузал бантIиссар участковый хIакинтурал. ХIакинначIату къашайшалан ккаккан бусса даруртту бусса посылкартту диян дуллантIиссар волонтертал. Волонтертурал хIарачат бан аьркинссар, къашайшалтращал хьунакъабавкьуну, дарурттал посылка тапшур дан.
Медициналул идарарттал дуллусса, къашайшалтран даруртту биян бан аьркинсса адресру дуссар волонтертурачIа. Волонтертурал кьюкьравух буссар студентътал, жяматийсса ишккаккулт, спортсментал ва цаймигу. ХIакьинусса кьини райондалул азарханалий буссар ковидрал къашайшалтран аьркинсса цинявппагу даруртту.
Акция байбивхьусса цалчинсса кьини, волонтертурал даруртту биян бунни 5 шяравусса 13 кулпатран. |
Заур МахIаммадовлул кIицI лавгунни уттинингу волонтертал, ахIвал-хIал кIюласса кулпатирттан дукия ва льготарттай итабакьайсса даруртту биян буллай чялишну зий бивкIшиву.
– Уттирив, вайннал кумаг хъиннува тIалавну бур, цанчирчан цала ичIува ва азар лархъун къашавайсса инсантал хъиннува гьарза хьуну буну тIий. Барчаллагьрай ура дакIнийхтуну ва давривух хIала бувхсса волонтертурайн. Вай цивппагу цIакьну дуручлай буссар ковидрая мюхчан шаву мурадрайсса, Роспотребнадзорданул чулухасса тIалавшиннарду, – увкунни Заур МахIаммадовлул.
