![](http://ilchi.beget.tech/wp-content/uploads/2019/11/IMG_7475.jpg)
Гьашину 110 шин там хъанай дур цIанихсса къавтIала, Дагъусттаннал халкьуннал артист Жамалуттин Муслимов ниттил увну.
Жамалуттиннул аьпалун хас дурну, вай гьантрай Гъумук хьунни оьрчIал творчествалул фестиваль «Лаккуяллил бюхттулшивуртту» ва Жамалуттин Муслимовлул фольклорданул ирсирая бусласисса конференция. Мероприятие сакин дурну дия Лакрал райондалул администрациялул, ДР-лул Культуралул министерствалущал ва Халкьуннал творчествалул къатлущал цачIуну.
Лакрал райондалул бакIчи Юсуп МахIаммадов:
— Жамалуттин Муслимовлул оьтту-ттурчIавура духьунссия магьирлугърахсса ччаву, акъарив щала оьрму мунин харж къабанссия. Цанна къавтIалал янна дурухханшиврул къатта бавххуссар тIий, буслан бикIай мунал шяравучутал.
Дунияллийх цIа ларгсса къавтIалал МахIмуд Эсембаевлул цалчинсса учительнугу хьуну ур Жамалуттин Муслимов, танащал Къиргъизнаву хьунаавкьуну. 1942 шинал май зурул 7-нний бувксса «Советская Киргизия» кказитрай бувсун бур Жамалуттин Муслимовлул цала махъ дирхьуну диркIсса дуцири арцу дяъвилун кумагран дирчуну диркIшиву. Фольклорданул коллективрдащал 736 концерт ккаккан дурну дур Ватан дуручлачиминнан.
Лакрал къавтIавуртту цIу дуккан даву дакъасса, мунал, цала ляхъангу дурну, дуруххайсса диркIун дур гьарца къавтIавринсса янна.
![](http://ilchi.beget.tech/wp-content/uploads/2019/11/IMG_7424.jpg)
магьирлугърал школалул оьрчIал Лакрал гимн щаллу даврийну
Жамалуттин Муслимовлул каялувшиндаралу 1970-80-ку шиннардий фольклорданул ансамбллу сакин дурну дур Лакрал, Ккуллал, ЦIунтIиннал, Гергебиллал, ТIиляратIиял, Кьасумккантуллал Аьхьхьахъиял, Бущихъиял ва цаймигу районнай. Бусса оьрмулий якъаувцун ур фольклордания ва халкьуннал къавтIаврия.
КIулшиву дулаврил ва культуралул управлениялул каялувчи Явсупи ХIамзаев:
— Гъумук «Гъази-Гъумучи» ансамбль сакин дуллалисса ппурттуву компартиялул щала райондалия миву къавтIунсса жагьилтал тIалав буллай байбивхьусса чIумал, райондалул комсомолданул кIилчинма секретарьну зузисса на навагу му иширавух гьуртту хьуссияв. Амма, Жамалуттин Муслимовлул кьянкьасса тIалавшинна душиврийн бувну, къавтIунсса тIайлабацIу ттун къавхьуна.
Дагъусттаннал Музыкантътурал союзрал хъунама Хан Баширов:
— Жамалуттин Муслимовлул цIакьсса дусшиву дия 1960-ку шиннардий Дагъусттаннал балайлул ва къавтIаврил ансамбльданий каялувшиву дуллай ивкIсса ттул бутта Мирзахан Башировлущал. Жамалуттин ия цала даврил хIакьсса фанат. Ансамбль «Лезгинка» хIасул давриву, репертуар гьарза-гьарта давриву мунал агьамсса кIану бувгьуссар. ДакIния къалагай «Тучи покидают небо» тIисса ва Имам Шамиллуясса киносуратирттавусса мунал ххаржантирттащалсса къавтIаврия махъ ливчIсса асарду.
Райондалул кIулшиву дулаврил ва культуралул управлениялул каялувчинал хъиривчу Лида Кьурбанова:
— СахIналийн къалагайсса къавтIалт буссия «Гъази-Гъумучи» ансамбльдануву къавтIий. Дагъусттаннал паччахIлугърал пединститут къуртал бувну махъ навагу бувкIссияв ансамбльдануву къавтIунсса хияллай. Амма кIира шинава ансамбль ппив хьуна. На институтрал ансамбльдануву къавтIий бивкIсса кIул хьувкун, Райкомрал ва исполкомрал ттуй бивхьуна бигар ансамбль цIу дуккан дансса. ДачIи шинал мутталий ансамбль цIудуккан дурну, 1986 шинал Лакрал шаннагу райондалийх, шагьрурдайх гастроллай занай байбивхьусса ппурттуву жун кумагран увкIуна Жамалуттин Муслимов. Ттун хъунмасса бахтти хьуссар жангу, рухIгу магьирлугъран харж дан дунияллийн увксса инсаннащал зун нясивну лякъаву, мунал дарсру.
«Счастливое детство» ансамбльданул каялувчи Шалуми Матаев:
— Жамалуттин Муслимов ия гьарца ишираву ляличIисса инсан. Ганал дакIниву бия Дагъусттаннал фольклорданул ххазна. Хореографтурал ганая хъинну чIявусса лавхьхьуссар. Ттунгу мукунсса тIайлабацIу хьуссар.
«Лезгинка» ансамбльданул къавтIала Галина Кьурбанова:
— ХIакьину машгьурсса оьрчIал къавтIаврил цинявппагу коллективрдал каялувчитал Жамалуттин Муслимовлул фольклорданийн чул бишлай буссар. Гьарца райондалий дуссар цала фольклор, цала аслийсса магьирлугъ. Ми гьарзат жула къавтIавурттаву яхьун аьркинссар. «Лезгинка» ансамбльдануву мунал дирхьуссар халкьунная бусласисса, халкьуннал магьирлугърая бусласисса къавтIавуртту.
«Ватан» ансамбльданул каялувчи Аьли МахIаммадаьлиев:
— Жамалуттин Муслимовлул фольклор цирив къакIулсса чIявусса хореографтуран яру тIивтIуссар. Ттунгу ххуллу тIивтIуссар. «Ватан» ансамбльданул каялувчину ацIайхту, на га консультантну зун увцуссия. Ганал пишакаршивугу, кIулшивурттугу ттун ххишала дакъа дучIи ляркъуссар.
«Асса» ансамбльданул каялувчи Аьлиагъа Хамдулаев:
— Жамалуттин Муслимов на ккалли ара, Совет Союзрай акъассагу, дунияллул лагрулийсса хьхьичIунсса къавтIалан. Га ия фольклорданул къавтIала. Лакрал къавтIавурттая айивхьуну, ганан кIула дагъусттаннал, ккавкказуллал гьарца миллатрал къавтIавуртту.
Фестивальданул дайлитIулий Жамалуттин Муслимовлул душнил Зумрутлул барчаллагь увкуна ДР-лул культуралул министр Зарема Буттаевахь, Халкьуннал творчествалул къатлул хъунмур Марита МухIадовахь, Лакрал райондалул бакIчи Юсуп МахIаммадовлухь, культуралул управлениялул зузалтрахь буттал цIанил ва захIматрал хIурмат буручлай бушиврухлу.
Зулайхат Тахакьаева