[dropcap]В[/dropcap]ай гьантрай 70 шинал оьр­му­лувун ухлай ур ххаллил­сса лаккучу ХIажидаудлул арс Юсуп Рамазанов.

Увну ур Юсуп АьсатIиннаву Нартовский райондалий захIмат ххирасса, тIул-тIабиаьтрал бавкьусса нитти-буттал кулпатраву. Ларайсса даражалул кIулшивурттугу ларсун, захIматрал ххуллу байбивхьуну бур заводрай слесарьну. АрхIал зузиминнан Юсуп ччя­сса чIумул мутталий ххира хьуну ур цала иминсса хасиятрайну ва лагмаминнан буллали­сса хIурматрайну. Му бакъассагу, Юсуп ивкIун ур даврих гъира бусса, дуллалимур лажин кIялану бартдигьайсса зузала. Мунияр махъ Юсуп зий ивкIун ур личIи-личIисса давурттай, кув кIанай – хъунаману, кув кIанай – хъунаманал хъиривчуну. Чув ухьурчагу, хIурматрай, бусраврай ивкIун ур.

2003 шинал ва увцуну ур Лак­рал райондалул бакIчинал кумагчину. Юсуп Лаккуйн кIункIу аврил сававгу хьуну дур ва Лакку кIану ххирасса, буттал улклуй дакI цIуцIисса ушиву. ЧIявучин кIулсса куццуй, гай шиннардий жула лакрал миллатралгу тIалавшинна диркIссар зунттавун гьунар бусса, марцIну даву дайсса, лакку билаятрах ччаву дусса гьалмахтал кIункIу баву. Цала даврий бихьлахьи­сса захIматгу чIалай, халкьуннаха дуллалисса аякьагу дурчIлай, жяматран Юсуп ххира хьуну ур. Цаманал чIарав ацIаву, жагьилминнан кумаг баву, хъунанал хIурмат баву ванал муданнасса хасият дур. Ци ишираву бухьурчагу кумаграх мюхтажну увкIсса инсан Юсуплул рязи къаувну къаитай. Ванал тачIав къаучай му масъала цайн къабагьайссар, му биттур бан цайми зузалт буссар куну.

Ванал захIмат хIисавравун лавсун, ду­ллуну дур «ДР-лул муниципал къуллугърал лайкь хьу­сса зузала» тIисса бусравсса цIа. Юсуп, лакрал щархъаву акъассагу, чIярусса Дагъусттаннал районнал щархъавугу кIулну ур. Шагьрурдайсса къуллугъчитурачIа ва сийлий ур.
Юсуп ХIажидаудович, 70 шинал юбилейращал барчагу уллай, чIа тIий буру вин цIуллушиву, гьарица давриву тIайлабацIу. ЧIяву баннав жула Дагъусттаннай виха лавхьхьу­сса, дакI марцIсса, захIматрая нигьа къабусайсса къучагътал.

Даниял Магьдиев