ХIакьинусса кьини инсаниятран хъуннасса нигьачIаву дусса бала бур наркотикру. Ва балаллул хьхьичIалу кьукьинсса чаран лякъин багьлай бур, хасъсса къуллугъирттан бакъассагу, кIулшивуртту дулаврил аралуву зузиминнангу.
ОьрчIру ва нину-ппу наркотикирттая арх баву, миннуясса нигьачIаврия бусаву ва цIуллу-цIакьсса оьрмулийн кIункIу баву мурадрай, ЦIуссалакрал райондалий дунни наркотикирттайн къаршисса цаппара мероприятияртту («Горькие плоды сладкой жизни», «Родительские уроки», «Твой выбор», «Чистый район – без наркотиков», «Вместе все преодолеем»).
«НацIусса оьрмулул кьурчIисса ахъулсса» цIанилусса акциялул лагрулий дуклаки оьрчIан ккаккан дунни «Изгой» тIисса кутIасса фильм (кинокомпания «АМАРАНТ»).
Му ххал дурну махъ школалул психологтурал ва социал педагогтурал наркоманиялул масъалалул хIакъираву ихтилатру бунни дуклаки оьрчIащал.
«Наркотикру бакъасса марцIсса район» акция нанисса чIумал Аьрасатнал дуклаки оьрчIал суккушиндарал (РДШ) волонтертурал кьюкьравуминнал, кIичIирттавух занай, бавчIунни наркотикру дащуй бихьлахьисса, цIуллу-цIакьсса оьрмулийн оьвтIисса буклетру.
Дуклаки оьрчIан ляличIинура ххуй дирзунни квест – тIуркIулул журалий дурсса «ЦачIу гьарзат бюхъантIиссар» тIисса акция.
Дуклаки оьрчIал жавабру дуллунни наркоманиялун ххуллу кьукьаву мурадрай ци зун аьркинссар т1исса суаллахьхьун. Цинярдагу мероприятияртту нитти-буттан ва дуклаки оьрчIан мюнпатсса хьунни.
