Апрельданул 11-нний Дагъусттаннал БакIчи Сергей Меликовлул каялувшиврий хьунни региондалул экономика лядуккан даврин хасъсса Оператив штабрал батIаву.
Ххал бивгьунни чIиримур ва дянивмур ишбажараншиврулсубъектирттан кумаг баврил, мукунма муниципал сакиншиннардай шяраваллил хозяйствалул ярмукIартту сакин баврил масъалартту. Миннуяр ххишалагу, ххал бивгьунни налогру датIаврил масъалартту.
Региондалул каялувчинал тIимунийну, жула билаятрайн цуксса кьюч бигьлайнугу, Аьрасатнал экономика цIусса шартIирдайн аьдат хъанай дур.
«ХIакьинусса кьини жучIара валюталулгу, дукиялулгу, хъус-хъиншивуртталгу рынокирттай тагьар цалий дарцIусса дур. ЦIана хъуннасса агьамшиву дуссар экономикалул иширттал ялув бацIаврил, багьри цакуну лахъ хьун къабитаврил ва хъус чан хьун къадитаврил. Му ххуллий хъуннасса даву дуллай бур циняв федерал даражалул министерстварттал ва идарарттал.
Хъуннасса даву дуллай бур билаятрал каялувчитуралгу», – кунни Сергей Меликовлул.
Республикалул каялувчинал бувсмунийну, республикалул даражалий цIакь дурну дур Экономикалуву лябукку баврил ва социал тагьар цалий дацIаврил мероприятиярттал план, щурущи дуллай бур налогирттал хIаллихшинну, хIадур буллай бур давуртту дакъаминнансса зузи кIанттурду.
Сергей Меликовлул бувсунни цIанасса ппурттуву дузал дуван аьркиншиву идарартту (предприятияртту) бацIаву дакъа зунсса шартIру, миннун цIусса логистикалул ва производствалул чулухасса дахIавуртту дувансса кумаг.
Ми давурттан хасну федерал центрданул хIадур бувну бур цалва-цалва отраслирдаятусса кумагру.
«Чаранну ккаккан бувну бур, арцурду итадаркьуну дур. Жулва задача хъанахъиссар, ми арцу тIайлану зузи дурну, миннуя бюхъайссаксса хъунмасса мюнпат ласун», – кунни субъектрал каялувчинал.
Региондалул экономикалул лябукку хъун баврил чаранная бувсунни республикалул цалчинма вице-премьер Руслан Аьлиевлул.
Ххал бигьлагьисса масъалалул хIакъираву ихтилатру бунни мукунма ДР-лул УФНС-рал (налогирттал къуллугъ) каялувчинал хъиривчу Нуруллагь Хизриевлул, Дагъусттаннал бизнес-омбудсмен Мурад ТIалхIатовлул.
