МахIачкъалалив, Региондалул нефтегазовый колледжраву хьунни Буттал кIанттул цIанийсса Хъунмасса дяъвилий Ххувшаву ларсун 81 шаврин хас дурсса, «Мы о войне стихами говорим» тIисса, колледжрал студентътурал дянивсса пасихIну шеърирду буккаврил конкурс.
Ваний гьуртту хьунни 1-ми ва 2-ми курсирдал студентъал. Вайннан кьимат бишлай бия ораторшиврул искусствалул тренер, МахIачкъала шагьрулул Депутатътурал МажлисрачIасса Жагьилтурал парламентрал депутат Наиб КьурбанмахIаммадов председательсса жюри. Миннаву бияв нагу, «Илчи» кказитрал отделданул редактор Андриана Аьбдуллаева, Дагъусттаннал халкьуннал артист, Аьрасатнал Чичултрал союзрал вакил, «Сердце отдаю детям» тIисса конкурсрал лауреат Владимир Мещерингу, Ярагъуннил гужирдал ветеран, аьралий иширттал гьурттучи, полковник Нураттин Амирхановгу. Мероприятие дачин дурну бия колледжрал директорнал хъиривмур Жамиля Каримова.
Ва бия конкурсрал сакиншинначигу. Конкурс дайдишин хьхьичI оьрчIащал ихтилат бунни Владимир Мещериннул. Хъирив конкурсрал гьурттучитурал бувккунни Буттал кIанттул цIанийсса Хъунмасса дяъвилухасса, жула халкьуннал чувшиврухасса, Ленинградуллал блокадалухасса Э.Асадовлул, К.Симоновлул, А.Твардовскийл ва м.ц. шеърирду.
Жюрилул кьимат бишлай бия пасихIну, бюхханну буккаврин, усттаршиврун, сахIналул культуралун ва творчествалул чулуха хIал кIулшиврун.
Жюрилул хIасиллу даннин Жамиля Рамазановнал дунни Буттал кIанттул цIанийсса Хъунмасса дяъвилул тарих кIулшиву ххал дуллалисса викторина. Мунивух хIала хьунни мероприятиялул циняв гьурттучитал. Владимир Мещериннул ккаккан бунни ораторшиврул гьунарданул кьюлтIшивурттая ва художествалул декламациялул техникалия бусласисса мастер-класс. Бувккунни шеърирду.
ХьхьичIунсса кIанттурду бувгьусса оьрчIан дипломру, тамашачитурал язи бувгьуминнан Барчаллагьрал чагъарду буллунни Нураттин АхIмадхановлул ва Наиб КьурбанмахIаммадовлул. Мероприятиялул программа дия яргсса, авадансса. Му къуртал хьуну махъ рирщунни циняв гьурттучитал бавцIусса сурат.
Андриана Аьбдуллаева
