Ххувшаврил кьинилул хьхьичI гьантрай МахIачкъалалив Дусшиврул къатраву хьунни «Милосердие на войне: Красный Крест 1941-1945» цIанилусса выставка тIитIлатIисса батIаву.

Выставка хас дурну дия дяъвилул цIарава щавурду дирми буккан буллай, оьрмурду ххассал буллай бивкIсса аьралий хIакинтуран, санитар зузалтран, цала хушрай ва даву дуллай бивкIминнан.

Выставка тIитIлатIисса ихтилат бунни Аьрасатнал ЯтIул Ххачлил Дагъусттаннал отделениялул председатель Раиса Шагьсиновал.
– ХIакьину шиккун жу оьвчарду медициналул колледжирттал студентътурайн, вайннан тарих кIулну бикIаншиврул. Мукунма оьвтIунтIиссару дуклаки оьрчIайнгу, ЯтIул Ххачлил тарихращал кIул хьуншиврул. Бюхъайхха выставкалия махъ вайннава щин-бунугу ччан бикIан цалва оьрму медициналун хас буван, мюхтажминнан кумаг буллан. Буттал кIанттул цIанийсса Хъунмасса дяъвилул шиннардий ЯтIул Ххачлил хIадур бувну бур 300 азарунния ливчусса санитар дружинниктал ва санитартал, вайннал захIматрайн ва хIарачатрайн бувну 17 миллион инсантурал ххассал буван бювхъуну бур, – увкунни ванил, санитар дружинниктурал даврия гьарта-гьарзану буслай.
Выставка хIадур дурну дия Дагъусттаннал ХIукуматрал, Дусшиврул къатрал, Аьрасатнал ЯтIул Ххачлил Дагъусттаннал отделениялул ва Дагъусттан Республикалул паччахIлугърал Центральный архиврал.
Выставка тIиртIуну дикIантIиссар майрал 30-ннин.

Бадрижамал Аьлиева