МахIачкъалалив Р. ХIамзатовлул цIанийсса Национальный библиотекалий тIиртIунни Республикалул Халкьуннал творчествалул къатлул «Самородки» проектрал лагрулийсса «Зунттал рангру» цIанилусса выставка.
Ванил ляличIишивугу дур шикку дирхьусса суратру ляличIисса оьрчIал каруннила дурксса душивруву. Тамашачитурал хьхьичIун ва ххуллухь дуккан дурну дур Хасавюрт шагьрулийсса «Спартак» цIанилусса Культуралул дворецрал гьанулий зузисса «Краски гор» арт-студиялийн заназисса, цIуллу-сагъшиврул ляличIишиву дусса оьрчIал дирхьусса 50 сурат. Ва студиялий каялувшиву дуллай ур Аьрасатнал Пастелистътурал союзрал член Шамил Закарияев. Шикку укунмасса оьрчIащал суратру дихьлан занай буссар цIуллу-сагъшиврул ссуссукьусса оьрчIру (аутизм дусса, къюкIсса, гъалгъа тIун къашайсса). Выставка тIитIлатIисса кIанайн бавтIун бия республикалул магьирлугъраву ва маданиятраву цIарду машгьурсса инсантал, оьрчIал педагогтал, нитти-буттахъул ва дустал.
Ва выставкалия Республикалул Халкьуннал творчествалул къатлул директор Марита МухIадовал укун увкунни:
– Ва хъанахъиссар ттунна хъинну ххирасса «Самородки» проектрал ца бутIану. ХхюцIалла яргсса пастель, Хасавюрт шагьрулиясса, гьунар бусса 30 оьрчIал дирхьусса. Шиккусса гьарцагу сурат – му чIирисса дуниялли, оьрчIан цанна хIисав хьусса ва чагъарданийн ласун бювхъусса. ТIабиаьт, натюрмортру – вай цимурца дурну дур дакIнийхтуну. Ттун хъинну асар хьунни «Краски гор» студия личIи-личIисса оьрчIан кIилчинсса къаттану шаву. Хъунмасса барчаллагь ванил каялувчи Шамил Закарияевлун ва цалва оьрчIайн вихшала дирхьусса, вайннал чIарав бацIлацIисса нитти-буттахъан.
Бадрижамал Аьлиева
