
[dropcap]Н[/dropcap]ину. Ва мукъул тIааьншиву, кIукIлушиву, ттюнгъашиву. Щала дунияллийсса миллатирттал сакиншиндарал (ООН) ккаккан дурну дур ноябрь зурул махъра-махъсса алхIаткьини Ниттил кьинину.
Ноябрь зурул 20-нний Ваччиял шяраву библиотекалий хьунни му кьинилун хас бувсса мажлис-байран.
[dropcap]Н[/dropcap]иттил кьинилун хас бувну «Зунттал хъами» журналлу, Дагъусттаннал чичултрал ниттихъан хас бувсса луттирду, ниттил ва оьрчIал хъуннасса сурат лархъсса мурцIу хIасул бувну бия. Шиккун бавтIун бия райондалийсса циняв шяраваллал библиотекарттал зузалт ва Ваччиял школалул мукьилчинмур классрал оьрчIру, укунсса мажлисирттай муданмагу гьуртту шайсса учитель ХIусайнова ХIуриящал.

[dropcap]М[/dropcap]ажлис тIивтIуна библиотекалул каялувчи ПатIимат ХIажиаьлиевал. Тамашачитурал хьхьичIун бувккун, Ниттил кьинилун хас бувсса номерду ккаккан бувна оьрчIал. Миннал щаллу бувна ниттихасса балайрду, бувккуна оьруснал ва Дагъусттаннал шаэртурал ниттихъан хас бувсса чIявусса шеърирду, ккаккан дурна къавтIавуртту.
[dropcap]М[/dropcap]уния махъсса давурттив хьуна шяраваллал библиотекарттал зузалтрал дянив. Ва давугу дия конкурс-викториналул лагрулийсса: «Кулпатравусса лу» ва «ХIисав-сан даву» тIисса. ХIажиаьлиева ПатIимат суаллу буллай, шяраваллал библиотекарттал зузалт жавабру дуллай бия. Хъинну бажар бусса бия циняв зузалт.
КIицI дуванну вайннал цIарду: Хъусрахь – ХIажиева Сабрина; Ккулув – ХIажиева Аьйша, Алхасова Сапижат, Маммаева Роза; 1-мур ЦIувкIрав – Кьурбанаьлиева Зульфия; Ваччав – Исакьова Аьишат, Мустапаева СалихIат, Аьлиева Шавлухъ; ЧIяв – Ибрагьимова Гурсалан; Хъювхъав – ХIасниев НурмахIаммад; ЦIуйшав – АхIмадова Мариян; Вихьлив – СайкIуева Жамиля; Къянив – Сяидова Аьйша; 2-мур ЦIувкIрав – Аьбдуллаева Аьжа; ЦIущарнив – Идрисова Ира.
ХIарачат бувара душрув, зугу жула миллатрал культуралул ва «Илчи» кказитрал уртакьталлуча!