ЦIуссалакрал райондалул администрациялий хьунни идарарттал каялувчитурал дурмуния ва дуллантIимуния бусласисса ирглийсса совещание.

Райондалул бакIчи МаматIи ХIамзатовлул кIицI лавгунни ци давуртту дулларчагу, школалул ремонтрая тIайла хьуну, хасъсса аьралий операциялул гьурттучитурал кулпатирттан кумаг баврийн бияннин, агьаммур мурад райондалул жяматрал ялапаршиннарал шартIру къулай даву бушиву. Совещаниялий гьаз бувсса агьамми масъаларттавасса ца бия шяраваллал диц-куц ххуй даву. Ххишаласса къулагъасрайн лавсун бия Ямансу шяравун щин дуцаврил масъала. Хьунадакьлакьисса захIматшивурттугу ххал диргьуну, масъала щаллу баврил ялув бацIанми ккаккан бунни.

Райондалул каялувчитурал ляличIисса къулагъасрайн лавсъсса масъала бур кIинтнил чIумуйн хIадур шаву. Мукунна ххишаласса къулагъас дунни кIулшивуртту дулаврил инфраструктуралул тагьарданух. Ихтилат хьунни цаппара школарду бакьин баврия. Аьрщарал ва хъуслил арарду низамрайн дуцаву ва закондалул тIалавшиннарду щаллу даву мурадрай сияхIрайн ласун увкунни мизитру ва цаймигу диндалул объектру. Гьаз бунни хасъсса аьралий операциялул гьурттучитуран ва миннал кулпатирттан кумаг баврил, миннан аьрщи дулаврил масъалагу.

Идарарттал каялувчитурал цала-цала дурмуния бувсунни. ЦIуминалийсса ЖКХ-лул хъунама Аьли ХIусмановлул бувсунни щинал дузалшиндарал ва кIинтницIунсса хIадуршиндарал давуртту къуртал дуршиву, ялун лирчусса диялдакъашивуртту дукьан дуршиву, мукунна ца къахьунмур хьуну, агьали щин дакъа къаличIан резерврал схемарду хIадур дуршиву.
Совещаниялул хIасиллу дуллай, хьхьичI ххуттайн ласунмур ккаккан дунни.