Гуж-цIакь бусса спортсмен, ккуличу ХIусман ХIусмановлул баян бунни цува Гиннесслул рекорд ккаккан дурсса британец Стив Килердуяр хьхьичIун уккан хIадурну ушиву.
ХIусманнул ца кIиссурах 120 кило дусса кIушиву гьаз дурну, 8 секундрай авцIусса видео дур «Лаккуй ислам» порталданий. «Guiness World Records»-рал баян бувну бур Стив Килердул декабрьданул 1-нний, 129 кило ва дачIи дусса штанга гьаз дурну, дунияллул рекорд ккаккан дуршиву.

Ванаяр хьхьичIма рекордсмен Беник Исраеляннул 2011-ку шинал ца кIиссурах гьаз дурну дур 121 килограмм. ЦIусса рекорд ккаккан дуван Стив Килер шинал лажиндарай хIадур хъанай ивкIун ур. Гьаннайсса, ХIусмангу цува ва рекордрачIан гъанну ушиву баян буллай ур. ЧIа учинну ва цIакь бусса, кьянкьасса чувнан Стивлуяр хьхьичIун уккансса тIайлабацIу.

ПатIимат Рамазанова