Дагъусттан Республикалул бакIчинал буржру биттур буллалисса Федор Щукиннул каялувшиндаралу хьунни Сакиншиндарал комитетрал батIаву. Шикку республикалул культуралул министрнал буржру чIумуйну биттур буллалисса Зарема Буттаевал бувсунни Аьрасатнал Халкьуннал цашиврул шинацIун дархIусса культуралул программа щаллу дуллалаврия.

Бувсунни шинал дянив республикалул культуралул идарарттал дурсса давурттая, республикалул магьирлугъ, маданият, багьу-бизу ккаккан буллай, билаятрал регионнайн хьуми аьр­ххирдая.

Бувсунни дуван дакI­ний­муниягу. Сентябрьданул 8-нний, Расул ХIамзатов увсса кьини, Аьрасатнал лагрулий цалчин хьунадакьин най буру Аьрасатнал Халкьуннал мазурдил кьини. ВаницIун дархIуну жулла республикалий щаллу дувантIий бур хъуннасса культуралул программа, цувгу хьунтIисса мукьцIалчин жучIара дуллалисса «КIяла кьурукьирттал кьинирдал» дайдихьуну. Литературалул фестивальданий гьуртту хьун жулла республикалийн бучIан най бур Аьрасатнал регионнаясса ва дазул кьатIувсса ряхва билаятраясса хъамал.

Сентябрьданул 9-нния 15-нин МахIачкъалалив С. Стальскийл цIанийсса бульварданий гьарца кьини ккаккан дуллантIиссар Аьрасатнал Халкьуннал цашиврул шинан хасъсса концертру, дуллантIиссар халкьуннал канил пишардал выставкарду, ярмаркарду. Мукунма хьунтIиссар «Вместе ради единства» цIанилусса культуралул марафон. Сентябрьданул 14-нний ва 15-нний республикалул хъуншагьрулул хъунмур майданнив хьунтIиссар республикалул муниципалитетирттаясса ва Аьрасатнал регионнаясса творчествалул коллективру гьурттусса концертру.

Октябрьданий хьунтIиссар «Тарки-Тау» луттирдал ярмарка, «Хранители традиций» фестиваль, щалагу Аьрасатнал «Русская сцена» тIисса цIанилусса театрал фестиваль, Аьрасатнал Кьиблалул халкьуннал культуралул ва спортрал фестиваль.
Аьрасатнал Халкьуннал цашиврул шинацIун дархIуну дуллалисса культуралул шадлугъирттал ахирну хьунтIиссар Халкьуннал цашиврул кьинисса, 4-мур ноябрьданийсса, шадлугъру.

Бадрижамал Аьлиева