АлхIаткьини МахIачкъалаллал 49-мур школалул дуклаки оьрчIан ххаллилсса бахшишну хьунни Аьрасатнал Спортсментурал союзрал президент, олимпий чемпион, кIийла дунияллул, ряххийла Европанал чемпион, спортрал легенда Давид Мусулбеслущалсса, СССР-данул олимпий чемпион, СССР-данул спортрал мастер МахIаммад-ХIасан Абушевлущалсса, олимпий чемпион ХIажимурад МахIаммадовлущалсса ва Олимпиадалул призер МахIаммад Ибрагьимовлущалсса хьунабакьаву.
Ваний гьуртту хьунни хасъсса аьралий операциялул гьурттучи, 1-мур штурмовой батальондалул 35-мур мотострелковый бригадалул хъунама стрелок-штурмовик, рядовой АхIмад АхIмадовгу. Мероприятиялул сиптачи хьунни 49-мур школалул директор Аьбдулкарим Айгунов. Букъавсун битан къабучIихьунссар, ванал каялувшиву дуллалисса школалий ччя-ччяни дайшиву оьрмулуву ва жяматийсса иширттаву хьхьичIун ливчусса, машгьурсса инсантуращалсса хьунабакьавуртту.
Бусравсса хъамаллурахь ва гьурттучитурахь барчаллагь тIутIисса ихтилатрайну дайдирхьунни Аьбдулкаримлул мероприятиягу.
– ОьрчIрув, хIакьину зущал кIул хьун, зухь насихIат бусан бувкIун бур жагьилтурал дянив сийлийсса, цIанихсса спортсментал. КIива зурул хьхьичI Москавлив дуллалисса спортрал турнирданий Давид Мусулбеслул махъ буллуна жучIана хъамалу учIансса. Спортсментурал цала буллусса махъ бацIан байссар. Укунсса журалул мероприятияртту даврил мурадну хъанахъиссар хьхьичIун ливчусса, итххявхсса инсантал дуклаки оьрчIан эбратну бишаву. Ттун хъинну ччива зуятугу республикалун хайр бусса инсантал хьуну. Умуд бур ва хьунабакьавугу зун мюнпатрансса хьунссар тIисса, – увкунни Аьбдулкарим Айгуновлул.
Цала оьрмулул ххуллия ва спортраву дурсса хьхьичIуннайшивурттая бувсунни Давид Мусулбеслул:
– На гъирарай увкIра хIакьину зущал хьунаакьин. Зул директорнащалсса ихтилатраву ттун исват хьуна, ва ялун нанисса ник Ватан ххирану тарбия даву мурадрай ххуй-ххуйсса давуртту дуллалисса инсан ушиву. Ва хъуннасса ялув ацIаву ва къулагъас дуллай ур дуклаки оьрчIру аьркин бакъасса иширттавух хIала хьун къабитаву ва ххуй дакъасса тIуллая буруччаву мурадрай.
Школалийн ва учительтурайн хъар хъанахъиссар оьрчIаву Ватандалухсса ччаву цIакь даву. Хъунмасса умуд бур зуяту школалулгу, республикалулгу цIа-кьини бюхттул дансса инсантал хьунссар тIисса, – увкунни ванал.
Шиккува кIицI лаган, Давид Мусулбес чIярусса шиннардий каялувшиву дуллай ур 800-нния ливчусса олимпий чемпионтал бусса, Аьрасатнал Спортсментурал союзрай.
Дуклаки оьрчIахь ва шиккун бувкIсса хъамаллурахь барчаллагь увкуна МахIаммад-ХIасан Абушевлул.
– Ххирасса оьрчIрув, зухь ххуйсса насихIатру бувсунни олимпий чемпионтурал. ХIарачат бара, вайнная эбрат ларсун, дуккавривугу, спортравугу хьхьичIуннайшивуртту дуллан. На хIат-хIисав дакъа ххарину ура ва школалий лавайсса даражалул технологияртту ва шартIру дузал дурну чIалай. Зулла чIун, оьнна гьан къадуллай, мюнпатрай ишла дуллалияра. КIулну бикIияра, ччан бикIарчан, дан къашайсса цичIар дакъашиву, – увкунни ванал.
Жагьилтурахь насихIатру бусласисса ихтилатру бунни мукунма хасъсса АхIмад АхIмадовлул, ХIажимурад МахIаммадовлул ва МахIаммад Ибрагьимовлул.
Дуклаки оьрчIал дакIру ххари дансса хавар бувсунни хъирив Давид Мусулбеслул. Ванал кIицI лавгунни Аьбдулкарим Айгунов Аьрасатнал Спортсментурал союзравун кьамул увшиву ва ванан дуллунни Олимпий союзрал чулухасса награда.
Хьунабакьаву чIюлу дунни ихтилатирттал лях-карах ккаккан дуллалисса концертрал программалул. Ва хIадур дурну дия «Поющая Чарода» тIисса ансамбльданул артистътурал ва Зульфия Илиясовал каялувшиндарайсса Искусствалул школалул оьрчIал.
Суаллу буллай, чялишсса гьурттушинна дурсса дуклаки оьрчIан дуллунни бахшишру, рирщунни дакIний личIансса суратру.
Имара Саидова
