Август зурул 12-нний Аьрасатнал президент Владимир Путиннул видеоконференциялул связрайхчIин Дагъусттаннай, Пермскаллал ва Хабаровскаллал крайрдай, Челябинскаллал ва Брянскаллал областирдай тIивтIунни социал инфраструктурардал объектру. Дагъусттаннай Шамхал поселокрай тIивтIунни 600 оьрчIансса кIантту бусса школа.

Владимир Путиннущалсса видеоконференциялий гьуртту хьунни Дагъусттаннал бакIчи Сергей Меликов, «ТСНРУ» АО-лул вакил Пахруттин ТIалхIатов, МахIачкъалаллал 49-мур школалул директор Аьбдулкарим Айгунов.
Шамхал поселокрай ялапар хъанахъисса агьалинан укунсса даражалул школа тIитIаву хъуннасса шадлугъ хъанай дур. ЦIусса школа зий байбишинтIиссар сентябрьданул 1-нний.

– Дазу дакъасса барчаллагь учин ччай ура Владимир Путиннухь. Дуклаки оьрчIругу, нину-ппугу ссавур дакъа ялугьлай бия ттизаманнул шартIирдал дузалсса школа тIитIиннин. Ххарину ура ва хъуннасса агьамшиву дусса объектрай каялувшиву дан ттуйнна вихшала даврия. ЧIа тIий ура оьрчIан ва ххаллилсса школалий куртIсса кIулшивуртту ласлансса цIуллушиву ва паракьатсса оьрму, – увкунни Аьбдулкарим Айгуновлул.
Ва цува каялувшиву дуллалисса школалул цIа-кьини бюхттул дан хIарачат буллалисса педагог ур. ХIакьину ванал каялувшиндаралусса школа республикалул хьхьичIунсса школардал сияхIрай бур.

Имара Саидова