Июльданул 20-нний МахIач­къалалив хьунни школарду хьхьичIунсса ккаккиярттащал къуртал бувми хIурматрай барча баврил мероприятие.

Муний гьуртту хьунни Дагъусттаннал бакIчинал чIумуйсса кIанайма Федор Щукин, парламентрал спикер Заур Аскандаров ва премьер-министр МахIаммад Рамазанов.
Дуккавриву личIинурасса ккаккияртту хьун дурсса выпускниктуран дуллунни 100 азарда къурушрал сертификатру. Награда дуллуминнавух бур ЕГЭ-лий 100 балл лавсми ва Щалагу Аьрасатнал школалий дуклакиминнал дянивсса олимпиадалий хьхьичIунсса кIанттурду бувгьуми. Премияртту ларсунни мукунна ГИА-лий (государственная итоговая аттестация) 95–99 балл лавсъсса выпускниктуралгу.
Гьашину Дагъусттаннай ЕГЭ-лий 100 балл лавсъсса ур 52 выпускник, 2 дуклаки оьрчI хьуну ур Щалагу Аьрасатнал дуклаки оьрчIал дянивсса олимпиадалул призертал.
Дуккавриву хьхьичIунсса ккаккияртту хьун дурсса выпускниктал барча бунни Федор Щукиннул.
«Зул хьхьичIуннайшивурттал ккаккан буллалиссар Дагъусттаннай гьарза хъанай бушиву аькьлу камил хьусса, итххявхсса, дурккусса жагьилтал. Зу чIалачIи бантIиссар жула республикалулгу, щала билаятралгу ялун бучIантIимур. Дагъусттаннай ЕГЭ-лий 100 балл лавсми гьарза хьуну бур 33-нная 57-ннайн бияннин. Ва асар биян буллалисса ккаккияр! Зу жула республикалул пахруру. На барчаллагь тIий ура педагогтурахь лавайсса даражалул пишакаршиврухлу ва зула даврийн дакI тIайлашиврухлу, нитти-буттахь тIурча – оьрчIацIун кабакьаврихлу», – увкунни Федер Щукиннул. Мероприятиялий республикалул бакIчинал чIумуйсса кIанайманал бавтIми кIул бунни «Команда Дагестана» тIисса цIусса кадрардал программалущал.
«Къуртал бара вузру, хьун бара опыт, яла жу ялугьланну зух. Жунма цачIу аьркинссар Дагъусттаннал ялун бучIантIимур дузал буллан. Шаппай зана шаву – му махъунмайсса ша бакъарча, му хьхьичIунмайсса ша ласавур «Дагъусттаннал Командалул» кьюкьравух», – увкунни оьрчIахь республикалул бакIчинал.
Ванал тIимунийну, республикалун аьркинну бур жагьилтурал сивсусса пикри-зикрирду ва сиптарду. Сертификатру дуллуну махъ Федор Щукин хьунаавкьунни ЕГЭ-лий 300 балл лавсъсса Гюлмира Халифатоващал ва ванил буттащал Асланнущал.
Щукиннул барча бунни Гюлмира ва ванин дуллунни багьлул ххирасса бахшиш.
ХIадур бувссар
ХI. Аьдиловлул