Гьашину Ккуллал райондалий Махъва-махъсса гюнгутIи бивщунни 11-мур класс къуртал бувсса 46 ва 9-мур класс къуртал бувсса 62 оьрчIан.

Школа къуртал буллалиминнахь барчаллагьрал махъру увкунни кIулшивуртту дулаврил идарарттал каялувчитурал, шяраваллал бакIчитурал, директортурал, учительтурал ва оьрчIал нитти-буттал. Ваччиял школалул выпускниктурахь ххуллухъин учин увкIун ия Кку­ллал райондалул бакIчи Шамил Рамазанов.
– Ххирасса оьрчIрув, хIурмат бусса учительтал ва нину-ппу! ХIакьину зул оьрмулуву ххариссагу, пашманссагу асарду хIала бухлахисса агьамсса кьини хъанай дур. Гихунмай зул хьхьичI буссар зула-зула оьрмулул ххуллурду, зува язи бувгьусса пишарду. ТачIав хъамамабитару ва дахIаву хIура хьун мадитару кIулшивуртту ва тарбия дуллай хъунмасса захIмат бивхьусса учительтуращал ва насихIатчитуращал. ДакIнийхтуну барчаллагь тIий ура выпускниктураха аякьалий бивкIсса, минная лайкьсса инсантал бансса хIарачат буллай бивкIсса учительтурахь.
Барчаллагь учин ччай ура выпускниктурал нитти-буттахьгу. ЧIа тIий ура зунгу, зул оьрчIангу цIакьсса цIуллушиву, оьрмулул ххуллийсса тIайлабацIуртту.ОьрчIал хьхьичIуннайшивурттал ххари буллай битаннав.

Ххирасса оьрчIрув, хьхьичIунну дуклай, лайкьну оьрму бутлай, Буттал кIанугу, Ватангу машгьур дансса хIарачат бара. Хъунмасса умуд бур зуяту райондалул цIа-кьини бюхттул дансса хха­ллилсса инсантал хьунссар тIисса, – увкунни ванал.

Выпускниктал, тIутIал кацIругу лавсун, цала учительтурачIан гъан хьусса чIумал, якьама буклай бия оьрчIру цивппагу, учительтал ва нину-ппугу.
Ва кьини райондалул бакIчинал ХIурматрал грамотартту ду­ллунни дуккавриву, спортраву, жяматийсса иширттаву хьхьичIунсса ккаккияртту хьун дурсса оьрчIан.
Мероприятие къуртал хьунни «школалул вальсрайну». Хъамакъабитулун рирщунни ­суратру.