Августрал 28-нний МахIач­къалалив Дусшиврул къатлуву хьусса республикалул хъуншагьрулул педагогтурал Августовское совещаниялул дайдихьу дуллалисса махъ лавхъуна мэр Жамбулат Салавовлул. Ванал бувсуна МахIачкъалалив гьашину цIусса 62-мур школагу тIитIинтIишиву ва 6-мур школалул ва 35-мур гимназиялул цIусса корпусругу. Бувсуна шагьрулул хьхьичIавасса 1-мур школагу гьануцIакул бакьин бувну, цIу буккан бувшиву, мукунма 15-мур школалий ва 5-мур интернатрайгу ремонт къуртал дуршиву.
Дагъусттаннал национал политикалул ва диндалул иширттал министрнал кIанайсса Тамирлан АбутIалибовлул кIицI лавгуна оьрчIан патриот тарбия дулавриву учительтурал хъунмасса бияла бушиву ва шагьрулул учительтал ва даву лайкьну дуллай бушиву.
ДГУ-лул ректор Муртазааьли Рабадановлул гьаз бувна вузирдавун буххаврицIун бавхIусса агьамсса масъалартту.
«Движение Первых» дастталугърал председатель ­Людмила Саэдовал балжину бувсуна цIусса дуккаврил шинаву цукунсса давуртту дуллан дакIний буссарив.
ХхюцIаллий мукьилчинмур школалул директор Сапижат Мазаевал бувсуна цуппа каялувшиву дуллалисса школалийсса Патриот тарбиялул центрдания, ­дуклаки оьрчIру СВО-лий гьуртту хьуминнащал хьунабакьайсса «Агьаммуниясса ихтилатру» тIисса проектрая. Бувсуна махъсса шанна шинал мутталий 60 «Вирттаврал парта» тIиртIушиву ва гьарца парта тIитIлатIисса мероприятие чувшиврул дарсну шайшиву, чара бакъа СВО-лий жанну дуллуминнал кулпатирттайн, мачча-гъаннайнгу оьвчайшиву ми тIитIлатIиний.
МахIачкъалаллал КIулшиву дулаврил управлениялул хъунмур ­Шаганэ Баймурзаевал бувсуна шагьрулийсса 157 дуккаврил идаралийн 136 690 оьрчI занантIишиву. КIицI лавгуна вайва идарарттай ушиву 7800 оьрчI, СВО-лий гьуртту хьуминнал, 1761 оьрчI садикрахлу багьа булаврия мурахас увну ушиву, ппухълу СВО-лий гьуртту хьуми буну тIий.
МахIачкъалаллал кIулшивуртту дулаврил идарарттай зий усса ур 8100 учитель ва тарбиячи. ХьхьичIунминнан дуллуна наградарттугу.
ПатIимат Рамазанова