МахIачкъалалив кIюрххил чак буван мизитравун занай бивкIсса оьрчIан 700 велосипед пишкаш дунни.

«МукьцIалва кIюрххил чак мизитраву» тIисса ва марафондалий гьуртту хьуну бур МахIачкъалалиясса ва лагма-ялттусса кIанттаясса 1500 оьрчI. ЦIубутIуй Муфтиятрал 100 оьрчIан дуллуссия бахшишру, амма къадирирми оьрчIан асар хьусса хIисав хьуну, вайннал хIукму бувну бур оьрчIру ххари бансса чаран лякъин, спонсортурайн буккан. «Зеленое яблоко» супермаркет, «Азим» фонд ва цаймигу спонсортал хIала бувххун, 704 оьрчIансса велосипедру машан ларсун дур. ОьрчIайн вай ласун оьвкуну бур Редукторный поселокрайсса Ися Идавсил (аь.с) РувхIанийсса центрданийн.

Велосипедирттал заллухъру хьунсса тIайлабацIу хьуну бур ЦIуминалийсса ДучIиясса оьрчIангу. Вайгу райондалул жагьилтурал ккурандалул каялувчи Минкаил Рамазановлущал бувкIун бур РувхIанийсса центрданийн цанна-цаннасса велосипедру ласун. Вай оьрчIахьсса ва вайннал нитти-буттахьсса барчаллагьрай, кIицI дуванну вайннал цIардугу: Оьмаров Камил, Гуйдалаев Сурхай, ХIусайнов Султан, ХIусайнов Шайх­аьли, Рамазанов Шамсуттин, Рамазанов Амир ва Рамазанов МухIаммад-Аьли. Муфтийнал кумагчи, динчи Идрис Асадуллаевлул кIицI лавгуна, исламрал ххуллу-ххуттайн кIункIу тIисса ник тарбия хъанай душиву, жулва бучIантIимунийнсса вихшала цIакь дуллалисса иш бушиву.

ПатIимат Рамазанова