Дагъусттаннал культуралул ва мазурдил кьини ниттил мазрайсса диктантру чирчунни республикалул школардайгу. Лакку мазрайсса диктантру чирчунни Ккуллал райондалул школардайгу. Ваччиял школалий, масалдаран, 50-нниха ливчусса инсантурал чирчунни. Цалчинмур ЦIувкIуллал школалийгу дуклаки оьрчIащал архIал чирчунни нитти-буттахъалгу.

– Ва Дагъусттаннал культуралул ва мазурдил кьини духьувкун, жу диктант чичлай байбишиннин бусарду ва кьинилул тарихрая. На кунма цайми учительтуралгу бувсунни жулва тарих, культура ва мазру ябаву хъунмур никирал хьхьичI бавцIусса ца агьаммур бурж бушиву, – увкунни диктант дурккусса учительница Умамат ХIусайновал. Диктант гьан дурну дур республикалул КIулшиву дулаврил ва элмулул министерствалул. Вайннал баян бунни текст ххал бивгьушиву вузирдал филологтурал ва мазрал, литературалул ва тарихрал институтрал (ИЯЛИ ДФИЦ РАН) аьлимтурал.

Гьашину ниттил мазрайсса диктантру чичаврил пунктру школардай бушаву, Дагъусттаннал элмулул ва кIулшиву дулаврил министерствалул ниттил мазру ябаврил ххуллийсса хъитри. Къизлярдал райондалул КIулшиву дулаврил управлениялул, масалдаран, баян бунни, республикалул халкьуннал мазурдийсса диктантру чичаврил акция райондалул тарихраву цалчин дуллалисса даву душиву, ряхва школалий ххюва мазрайсса диктантру чирчушиву: оьруснал, яруссаннал, даргиял, лазгиял, нугъайнал ва азирбижаннал. КIулшиву дулаврил министерствалул хьхьичIва баян бувна, ва гьар шинахсса акция хьунтIишиву ва диктант ххуйсса даражалий тIайла дурксса муниципалитетру кIицI лагантIишиву.

ПатIимат Рамазанова