[dropcap]Я[/dropcap]нварь зурул 20-нний, Автономиялул лагрулийсса Социалист республика хьуну 100 шин бартларгунни. Ва декрет букканнин хьхьичI,1920-ку шинал ноябрьданул 13-нний Темир-Хан-Шуралий (уттисса Буйнакскалий) хьуну диркIссар щалагу Дагъусттаннал Халкьуннал цачIусса чярхлийсса съезд. Га съездрай бувну бивкIссар хIукму Дагъусттаннай автономия баян буллалисса. Ва хIукмулийн бувнур яла махъ бувккун бивкIсса юридий зумунусса РСФСР-данул декрет.
Ккуллал райондалий ва байрандалун хас дурну хьунни ва хъанай дур личIи-личIисса шадлугъру, хьунабакьавуртту ва жула Дагъусттаннай автономия баян баврил тарихрая бусласавуртту. Райондалул шяраваллавусса клубирттаву, библиотекарттаву, школарттал жанахIирттаву вания бусласисса стендру, плакатру лархъунни. Гьай-гьай, коронавирус тIисса цIуцIаврия буруччиншиврул мероприятияртту дуллай бур мугъаятну, чIявусса инсантал къабавтIун.
[dropcap]Я[/dropcap]нварь зурул 15-нний Вихьуллал шяраваллил Культуралул къатравугу хьунни ва байрандалун хас дурсса шадлугъ. Культуралул къатлул сахIна бия чIюлу бувну Дагъусттан Республикалун 100 шин шаврия бусласисса баннер лархъун. Ва шадлугърай гьуртту хъанай бия культуралул къатлул зузалт: ХIасанхIусайнова Рукьижат, Оьмариева Камилат, БухIанова Заннишат, Халилова Шамсият, шяравусса искусствалул школалул зузалт ХIасанова Залина, Абачараева Гулизар, Вихьуллал школалул директорнал хъиривмур МахIаммадова Жинасат, чIярусса шиннардий оьрус мазрал ва литературалул дарсирдал учительну зузисса Маммаев МахIаммад. БавтIминнахь Дагъусттаннан 100 шин шаврия бувсуна МахIаммадова Жинасатлул ва Оьмариева Камилатлул.
Дуклаки оьрчIал – ХIасанхIусайнов Алимлул ва МахIмудиева Миясатлул дурккуна Дагъусттаннан хасну Бадави Рамазановлул ва ХIасан КIуруховлул чирчусса назмурду. Хьуна мукунма балайрду учаву, къавтIун бизаву ва шяраваллил оьрмулуву агьамсса кIантту бувгьусса чиваркIуннал ва хъаннил цIарду дакIнийн дичаву. Ва шадлугъран цIагу дия «Ттул азгъунсса Дагъусттан» тIисса. Гьай-гьай, мукунссар буниялагу жула Ватан — Дагъусттан.
