Вай гьантрай ЦIусса шинал байрандалун хас бувсса шадлугърал мажлис хьунни Хъювхъиял шяраву.
Ва хIадур бувну бия Рукьижат Оьмаева каялувчисса Аьрасатнал халкьуннал аслийсса культуралул центрданул зузалтрал. КIицI лаган, Центрданул зузалт чялишну гьуртту шайссар райондалий дуллалисса цинярдагу мероприятиярттай.
Рукьижат цуппава культуралул даврин куну лявхъусса инсан бур. МукьцIаллихъайсса шинну хьуну дур ванил культуралул аралуву зий. 1993- ку шиная шихунмай ва бур Хъювхъиял Культуралул къатлул (утти Аьрасатнал халкьуннал аслийсса культуралул центр) директорну. Каялувчинал бигарду щаллу баврицIун ва цуппагу гьуртту шайссар гьарицагу мероприятиялул программалуву.
Рукьижат барчаллагьрай бур цила даврил чIарав бацIлацIисса шяраваллил администрациялул бак1чи Асият Аьлиевайн, учительтурайн ва дуклаки оьрчIайн. Рязину бур цала даву багьайкун дуллалисса зузалтрая : художествалул каялувчи Сапижат МахIаммадовая, артистка Людмила ХIасниевая.
ЦIусса шинал байран гъан хъанахъисса гьантрай коллективралгу, цилагу цIания Рукьижат барча дуллай бур ЦIусса шин Хъювхъиял жяматрахь, цинявппагу лакрахь. ЧIа тIий бур цинявннан цIуллушиву, барачатсса, даркьусса шин.
