![](https://ilchi.info/wp-content/uploads/2020/05/bdhryfr-300x300.jpg)
Карашрал шяраваллил къутандалийсса дянивмур даражалул школалул тарих щалагу жяматрал тарихрал ца биялсса бутIану хIисав хъанай бур.
Так ца Карашрал щарнил агьалинацIун бакъассагу, ганил тарих бавхIуну буссар га къутандалул лагма-ялттусса цайми-цаймигу жяматирттал оьрмулуцIун. Цуппа тIивтIуния шинмай паччахIлугърал харжирайсса интернатгу бусса га школалийн дуклан букIлай бивкIссар, хIакьинугу бучIайссар, ряхра-арулла къутандалул оьрчIру: КIундиннал, ГьунчIукьатIрал, Читтурдал, КIулушацIрал, Бархъаллал, Шушиннал ва м.ц. БучIайссар гиккун дуклан хIатта шагьрурдаятугума.
ХIакьину га школа-интернатрал директорну зий ур гьунар бусса педагог, сакиншинначи, Ризауттиннул арс ТIагьир Айгунов.
Увну ур ТIагьир 1956-ку шинал Лаккуй Карашрал шяраву, Ризауттиннул ва Марияннул хъунмасса кулпатраву. Школа бувккуну махъ ванал къуртал бувну бур Дагъусттаннал паччахIлугърал университетрал филологиялул факультет, цуппагу хьхьичIунсса ккаккиярттай.
Цал ГьунчIукьатIув ца шинай, яла буттал шяраваллил школалий мукьра шинай учительну зий ивкIун махъ ТIагьир увчIуну ивкIссар Карашрал шяраваллил советрал председательну. 1995-ку шинал ивтссар жува тIисса школалул директорну.
Жард къаувкуну му жаваблувшиву ххисса къуллугърай зий ТIагьирдул гьашину бартлаглай дур 25 шин.
Директорнал ххаллилсса даражалий, цIу-цIусса методру ишла дурну, щаллу дай цалла дишайми предметругу. Мукуннасса тIалавшин дуну дарсру дихьлахьисса бур ванал каялувшиндарай зузисса учительталгу. Бабаюртуллал райондалул къутаннайсса цинявппагу школарттал дянив Карашрал школа хьхьичIсса ххуттай буссар. Шикку дуклакисса оьрчIру сайки мудан гьуртту шай республикалул территориал олимпиадарттай ва бугьай микку хьхьичIунсса кIанттурду. Директорнал хIарачатрайну республикалийсса цаппара цаймигу школарттацIун Карашрал школалий тIивтIуну буссар «Точка роста» тIисса дуккаврил центргу.
Педагог-директорнал ккаккиярттан багьайсса кьимат бивщуну, ТIагьир Айгуновлун дуллуссар «Дагъусттаннал лайкь хьусса учитель» тIисса хъуннасса цIагу.
КIулшиву ласаврил аралуву дакI тIайлану зий, захIмат буллай хьусса 25 шинал таварихгу барачат буллай, ваницIунма ТIагьир ниттил увну май зурул 10-нний кIицI лаглагисса кьинигу барча дуллай, чIа тIий буру жула даврил уртакьнан, итххявхсса каялувчинан чIярусса цIуллусса шинну, цIу-цIусса тIайлабацIуртту ва ххуй-хъиншивуртту. Бартлаганнав вил цинявппагу мурадру – даврийссагу, вила ичIувассагу.
Педагогтурал коллективрал чулухату
Раисат МахIаммадова