[dropcap]В[/dropcap]ай гьантрай Аьрасатнал ПаччахIлугърал Думалул депутат Аьвдулмажид МахIрамовлул аьрххи хьунни ЦIуминалийсса ЦIуссалакрал райондалул азарханалийн. Ванащал бия ЦIусса миналийн лак бизан баврил ва Аухуллал район цIу дуккан даврил масъалартталсса буллалисса управлениялул хъунама ХIажи Султанов, ЦIуссалакрал райондалул бакIчи МахIаммад-ХIажи Айдиев ва мукунма цаймигу.
Депутат хIаласса делегациялул ххал диргьунни райондалул азарханалул отделенияртту ва поликлиника. ЦIухху-бусу бунни азарханалий хъин хъанахъисса къашайшалтрахь ва хIакинтурахь.
Азарханалул хъунмур хIакин Булбул Исрапиловал бувсунни цачIанма медициналул кумаг тIалав буллай, райондалул агьали бакъассагу, лагма-ялттусса поселокирттай ялапар хъанахъисса агьалигу бучIайшиву. Исрапиловал мукунма кIицI лавгунни махъсса гьантрай райондалий ялу-ялун чан хъанай най бушиву коронавирусрал инфекциялул къашавайсса инсантал.
Вара кьини Аьвдулмажид МахIрамовлул ЦIуссалакрал райондалул администрациялул къатраву кьамул бунни райондалул щархъал агьалигу.
ДучIиннал шяравасса Оьмариева Соня бувкIун бия цинмагу, цилла ниттингу цIусса миналийн бивзун махъ кьариртсса къатрахлу багьайсса компенсация ласун кумаг баврил хIакъираву. Республикалул ХIукуматрайн хасъсса аьрза чичинсса хIукму бунни.
Гьамиящатусса ПатIимат МахIаммадова бувкIун бия къатри булаву анавар дуккан даврил ва аьрщарал участокрал ихтиярдал щаллушинна дусса документ дузал баврицIун кабакьара тIий. МахIрамовлул бувчIин бунни бизан баврил хIакъиравусса масъаларттал комиссиялул заседанияртту чIал къархьуну зий дайдишинтIишиву ва микку МахIаммадовал масъалагу ххал бигьин тапшур бувшиву.
Гьамиящатусса Марат МахIаммадов увкIун ия цалва мюрщисса оьрчIругу къатта-къуш булаврил сияхIрайн лахъан баву тIалав буллай. Ванал бувсунни хасъсса идарарттайн буллуну бикIсса документру, пикри бакъулшиву дурну, бакъа бувну, масъала дузрайн къабуклай бушиву. Мунил хIакъиравугу райондалул бакIчи МахIаммад-ХIажи Айдиевлул кIицI лавгунни бизан баврил комиссиялул заседаниялий ххал бигьлай бушиву му масъалагу.
