Дарбантлив, Сулайман Стальскийл цIанийсса паркраву, шадлугърал тагьарданий тIиртIунни «Кавказ обетованный» тIисса цIанилусса фестиваль. Ва сакин дурну дур Аьрасатнал жугьутIнал конгрессрал Дарбант шагьрулул администрациялул чIаравбацIаврийну.
Фестиваль дайдихьлахьисса шадлугърай махъру лавхъуна ФАДН-лул каялувчинал хъиривчу Станислав Белкиннул, Дарбант шагьрулул бакIчи Рустамбаг ПирмахIаммадовлул, ДР-лул Халкьуннал Мажлисрал комитетрал председатель Анатолий Карибовлул, ДР-лул миллатрал политикалул министр Энрик Муслимовлул ва туризмалул ва халкьуннал-художествалул сянатирттал министр Эмин Мардановлул, Аьрасатнал жугьутIнал конгрессрал исполнителный директор Анна Бокшицкаял ва цайминнал.
– Барча буллай ура цинявппагу дунияллул халкьуннал дянивсса цалчинсса этно-фестиваль тIитIаврищал. Ряхва гьантлул лахъишиврий Дарбант шагьрулий бюхълай бур чIяву-чIявусса халкьуннал, миллатирттал культура, аьдатру, багьу-бизу ххал буллан, – увкуна Станислав Белкиннул.
– Ччяния шинмайва, чIярусса шиннардил мутталий щаллагу дунияллул халкь букIлай бия Дарбантлив, гьарцама – цалла-цалла культуралущал, аьдатирттащал ва багьу-бизулущал, гьарцаманал шикку цалла аьш, цалва ша кьабитлай. Ва кIану тасттикь хъанай бур жулва шагьрулийсса чIяву миллатирттал культуралух ябивтукун. Дарбантлив яла агьаммургу личIи-личIисса миллатирттал ва диннал инсантал нахIуну ва бавкьуну цачIу ялапар хъанахъавур, – увкуна Рустамбаг ПирмахIаммадовлул.
– ДакI дарцIуну буру фестиваль ххуйсса даражалий гьаншиврий ва умуд бур, гьарца шинал дуллай, ва аьдатравун дагьанссар тIисса. Жу гьарца шинал бучIан булланну Дарбантлив культуралул цIуртти, чичулт, художниктал, режиссертал, актертал, музыкантътал, – куна Анна Бокшицкаял.
Фестивальданул лагрулий хьуссар ва хьунтIиссар личIи-личIисса шадлугъру, миннува чIярумигу – гьавалий, тIивтIусса кIанттурдай. Лавкьуми кIанттурдайсса шадлугъирттая дуссар тIайланнасса эфирду.