Январьданул 16-нний Оьруснал театрданул чIивимур залдануву хьунни СССР-данул халкьуннал артист, композитор Мурад Къажлаевлул аьпалул вечер, «Чтобы помнили…» тIисса цIанилусса. Ва сакин дурну дия Дагъусттаннал ПаччахIлугърал Опералул ва балетрал театрданул.
Уттигъанну аьпалул хьусса Совет Союзрал ва Аьрасатнал композитор, Аьрасатнал Федерациялул ЗахIматрал Виричув, Дагъусттаннал гимнрал автор Мурад Къажлаевлул цаярда махъ кьадиртунни культуралул хъуннасса аваданшиву. Ванал бивтунни яргсса, хъин-хъинсса иширттал авадансса оьрмулул ва творчестволул ххуллу, вания бусаврийну дайдирхьуна ва вечергу.
Хъирив театрданул хорданул (главный хормейстер – Эмилия Шихрагимова) щаллу дурна композиторнал хорданун чирчусса сочиненияртту, театрал постановкарттацIун чивчусса музыка, машгьурсса балайрду, ккаккан бувна «Имам Шамил», «Вернисаж», «Валида» ва цаймигу балетирдавасса ва опереттардавасса парчри.
КIулсса куццуй, композиторнал чивчуну бур 40-нния лирчусса кинофильмрацIунсса музыка: «Тучи покидают небо», «В горах мое сердце», «Иностранка», «Девочка на шаре», «Сестра музыканта», «Исполнение желаний», «Бархатный сезон», «Любовь моя, печаль моя», «Снежная свадьба», «Пора красных яблок» – вана вайннувасса цаппара. Ва хьхьуну щаллу бувна «Загадка кубачинского браслета» кинофильмравасса Петр Синявскийл мукъурттихунсса Мурад Къажлаевлул музыкалухунсса балай.
Вечерданий гьуртту хьуна Республикалул М. Къажлаевлул цIанийсса школалул гьунар бусса оьрчIругу – «Гуниб» ансамбль. КIулсса куццуй, ва цIанилусса ансамбль ванияр чIярусса шиннардил хьхьичI сакин дурну диркIссар Мурад Къажлаевлул. Ттизаманнул «Гуниб» ансамбльданул щаллу бувна Михаил Лермонтовлул «Белеет парус одинокий» назмулул мукъурттицIун композиторнал чирчусса макьандалийсса балай.
