ХIасан КIурухов
* * *
Оьмал-БакIул бакIрая
Уруганна лагмава,
Увччу хьуннин хIачIанна
ШамратIаясса гьава.
Майдан Вихьуллал арийх
Цал ттигу ябитанна,
МурцIуиттав кьюрчусса
Макьгу личин ританна.
Ттун ватан ххирассар тIий,
Ганз къабулланна хъуру,
Ххирар тIий, ххяхха буклай
КъабивкIссар буттахъулгу.
Амма диркIссар гайннаву
Хъит-шит чансса чувшиву.
Хъуни махъру къабуслай,
Яхъанансса хъуншиву.
Азардахъул шиннардий
Хъун дурссар гайннал Ватан,
Шайвавли жущарагу
Гайннал кьариртмур ядан?
Вайнна Вихьуллал щарнийн
Бургъил тIинтту зизавай:
Нава шикку лявхъусса
Щукру Хъунасса Заннайн!
* * *
Марч бивщукун, байбишай
Мурхьирдал аьлагъужа,
МаркIачIан бувксса барзгу –
ДакI хъинсса лаккукъужа.
Пахъ дагьну дур ттул щаргу
Щуну-Зунттул щутталу,
Шярава хъун ххуллугу
Ливхъун най бур уттану.
ЩяивкIун ура, дакIгу
БарзунттацIун дарзуну,
Цимигу шинай дуллай,
Къуртал къархьу ларзулу.
Яхъанан кьаст дуссия
Вихьлив, буттал къатраву –
Ттул кьастру лув лирчIунни
КIусса чIумул къатлилу.
Бакъачулийнмай хьунни
Ттул оьрмулул хьулурду,
Дунъяллул вайварттаву
Бяйкьунни ттул ххуллурду.
Алвагь дакIнил асарду
Ири-иривнайх бачIав.
КъабучIимунил кIичIу,
НахIала буллай, хIачIав.
Тти гьа хьуну бур дакIнин
Оьрмулул аьлагъужа,
Шавай ур ттуявагу
Иминсса лаккукъужа.
Амма акъара хIайп тIий
Оьван бувтсса оьрмулий,
Ванахха марч ттуйх ках тIий
Буттал къатлул бухкIуллий.
ХьхьичIажарттащал
ЦIаннал хъува хъякувкун,
Чаннал кIурх кIутта дучIай,
ЧантI кусса базурдавух
Тазасса дюхлу кIучIай.
ХьхьичIажарттащал ивзун,
ЩяивкIун ура хъюву,
Гьис-гьис тIисса дюхлулий
Дарссунни дакIнил къюву.
Бару бувсса барзунттал
ЦIан-чани кIилирчIунни,
Лахьхьусса хажалатру
ЦIаннавура лирчIунни.
Щуну-Зунттул лахъшиву
ЧIалан риртунни хьхьунил,
Ццах чин дунни пахъшиву
Ччясса лелуххул чIунил.
Зунзулчаннал зумардай
Лап чаннура на хьусса,
Ци бави – вай лахIзардай
Шану бикIай нахIусса.
Танмалшиву ххи хьуну,
Тяту буллай личIара,
ЧIарах лагай макI хьуну
Ччясса кIюрхнил ишара.
Щукру хIакьинувагу
Бювхъусса ччяни изан,
Щукру ккавксса цал ттигу
ЦIусса кьинилул биза.
Ци кIулссар ттун кIа Заннал
Ци чивчуну буссарив.
Укунсса кIюрхру ттигу
Дуссарив, дакъассарив…
Ттул ляхъин
КуртIний – аьтарттул ххурхху
Лахъний – ххяхха ларг ххяллу,
Хъун-Неххал тия чулий –
Хъяхъа кусса хъархъаллу.
На вай ххяллал гъанчура,
Хъархъаллал маччачура,
Жиндрал хьусса аьтарттал
Базулул ссурахъура!
БакIру кIяла барзунттал
На хъа цасса уссура,
Аьратталну бивщусса
Мурчардил гьалмахчура!
Вай ттул чIарав бавцIуссар
Мудан, ттуйн кьини дуркний,
Ясингу буккинтIиссар
Сурувравух ивхьуний.
* * *
Лекьрулул ттугъ кунна,
Хар-хавар бакъа,
Гьаз шай, ватан, ттуву
Вил кIусса макьан.
ЦIан дуллай кьинирду,
КъюкI дуллай хьхьурду,
Зяй-зяйтIий байбишай
Ттуву вил чIурду.
АпатIру ках тIий бур,
Ватан, вил зунпайх,
Аьзаврдал ттурзанну
Занай дур зунттайх.
Вил ялун дирну дур
ОьхIалсса шинну,
РатIай хъювхъу тIий дур
ЛухIисса щинну.
Хъазамрайн ккулларду
Хъямала багьлай,
Вил хъин-хъинми арсру
Лахъи къалагай.
Вил вайварттавату
ТачIав лагь къашай
ЯзинацIа хьусса
Щахъаннил гьарай.
Зунчал пар чирчагу
Барзунттал мицIай,
АьтIисса ниттихъул
Итталу бацIай.
Бухсса диван
Дарусса гъинтнил кьини, Вихьлив,
Лагабургъил тIинттал дурцIусса ларзу.
Танийва, аьпа биву, буттал лавсъсса
Бухсса дивандалий
ЩябивкIун бур:
Ттул нинугу, щарссагу, душругу.
Ца бухсса дивандалий –
Ттул лавгмургу,
ХIакьинусса кьинигу,
БучIантIимургу.
Ца бухсса дивандалий –
Ттул талихIгу,
Ттул ччавугу,
Ттул вихшалагу.
Ца бухсса дивандалий –
Ттул щала оьрмулул мяъна,
Ттул щалла дуниял.
Хъунмашиву ва чIивисса дивандалул!
НеххамачIув навалу
Заннайн сужда буллай пахъ багьсса
майдан,
Дюхлулсса неххамачI, някI талати ссав…
Заманалул ххютру иттала вай дан,
Никирттайнгу агьну, лажин-ка диссав.
МарцI хьунни асарду, ливцIунни пикри,
ЧантI кусса базурду таза бувккунни.
КIусса буруккинттал лухIисса сикри
Уттавасса чаннал бири-бат дунни.
Щукру бусса ттигу, пикри марцI буллан,
Дюхлулсса неххамачI, някI талати ссав,
Щукру дусса ттигу дакIниву чIуллан
Чумартсса буттахъал абадсса массав!
* * *
Ина цIияллайн лавхъний,
Ттул аьжаивсса Изай,
Ссурулусса цIурттигу
Ссапалун къавтIун бизай.
КIюрххицIунмай щинав най
Ина хIисав хьутари,
Ссавнил вин пишкаш бувай
Бургъил тIинттал гудари.
Ина ардарах найни,
Суждалий бацIай чIаллу,
Вил мурччив тIутIиври тIий,
Хъяврин шай чIимучIалтгу.
Ина чунмай гьарчагу,
Аглан хъанай вил ялув,
ИттацIанттал хъаттирдай
Левххун бачай ттул яру.
Цаманал ччиссай
МаркIачIанмай щавщи щюллисса мачIай
ЩатIив-щатIив бишлай, хъюлчайтIий
бачай,
ЛивцIусса мурчалгу ттул симан диссай…
Буси, цукун бура, цаманал ччиссай?
МаркIачIал хъиривгу, кьини кIидачIлай,
Абадсса низамрай хьхьу зана дикIай,
ЦIузурул турлилгу цIаннал мачI ттисай,
Буси, цукун бура, цаманал ччиссай?
Кьинигу тикрал шай, интгу тикрал шай,
Тайра тIутIив чантI чай та жула марщай,
НякI ссавнилгу личай тара та кисай…
Буси, цукун бура, цаманал ччиссай?
Буси, цукун бура, цаманал ччиссай,
Ттул гьавасрал ахIрам, ччаврил килисай,
ХIаз бурив бигьанма, лавгмур кьабитлай,
Цаманал хъаралу на хъамаитлай?
Буси, цукун бура, цаманал ччиссай?..
* * *
Ккурулавгунни мачIайх
ЦIаннал буруллуккуртту,
КIачIа бунни цIузурул
Цила мусил ккуккурду.
Занай ура зурулух,
Мурчал иттав уруглай,
Вихь бусансса мукъурттих
ТIутIал мурччаву луглай.
ДакIхъинсса дур дюхлугу,
Урисса дур урттугу,
Урттува байбихьлай бур
ЦIурттачIансса чурттугу.
ДакIгу най дур ссурулун
ТIинттал щачIанттайх ларай,
Ссавруннай вил цIа чичин
Чанна цIурттал ламарай.
Агь, дукIлай дур, дукIлай дур
Жура чIа тIисса хьхьурду,
МайшантIий бур цIубарзгу
Цила мусил ккуккурду.
* * *
ЛарчIунни гъинтнил гъарал
ЧIурдал кIунтIру чIа буллай,
ЧIувусса щинал синттай
ЧIюлусса макьан руцлай.
Хъирив ца чIавадушнил,
ЧIавахьулттил та чулий,
Итабавкьунни балай
Ттюнгъа-гъилисса чIуний.
Балайлуву махъругу
Ччиссаннал лавмартрая,
Циваннив аьтIийнмасса
Зунттал авдалтурая.
Агь, чанна шай, чанна шай
Дарщусса дакIнил кьарал,
Ватандалий ларчIувкун
Гъинтнил гъилисса гъарал!
Гъапул лавгсса асардан
МалхIан кунма савав шай.
Гъаралух тIуркIу тIисса
Гъилисса гъарал щай-щай
Базурдангу дарув шай
Гъарал тIинттал галайгу,
ЧIавахьулттил та чулий
ЧIавадушнил балайгу.
Зинан
Къювурдал къама бугьлай,
Ларгссар ттул цимигу инт…
Танийсса ттул хьхьурдугу –
Ццаххандарал лабиринт.
Ссувайшиврул гьивурду
Циксса дурххурвав чурххал?
Щукру бусса тти ина –
Ттунсса Ариаднал ххал!
