Сентябрь зурул 7-11 кьинирдай МахIачкъалалив хьунни Щалагу Аьрасатнал цIу лещан дувултрал ва ххассал бувултрал дянивсса музыкалул творчествалул конкурсрал шамилчинсса этап.Творчестволул бяст-ччал най бия «Журавли» тIисса научно-оздоровительный комплексраву.

КIицI лаган, Аьрасатнал МЧС-рал цIу лещан дувултрал ва ххассал бувултрал дянивсса музыкалул творчествалул конкурс аьдатравун дагьну дуссар. 2024-ку шиналсса финал хьуссия Сочилий, ларгсса шиналмур – Башкортосттаннай. Гьашину конкурсрал шамилчинсса этап МахIачкъалалив дан пикри хьунни сакиншинначитуран. Ва хас дурну дия Аьрасатнал Халкьуннал цашиврул шинан. Дагъусттаннал МЧС-рал Агьаммур управлениялул чулуха конкурсрай гьуртту хьунни хъунисса пожарду лещан дайсса хасъсса частьрал пишакар Исламхан Шихаибов. Конкурсрай гьуртту хьусса 90-нния ливчусса пишакартурава комиссиялул язи увгьунни 21инсан. Ми гьуртту хьунни сентябрьданул 10- нний Яруссаннал театрданул хьхьичIсса майданнив хьусса гала-концертрай. Мероприятиялий гьуртту хьун бувкIун бия Аьрасатнал МЧС-рал хъунаманал хъиривчу, виваллил къуллугърал генерал-лейтенант, Вячеслав Бутко, Дагъусттаннал ХIукуматрал председатель МахIаммад Рамазанов, регионнал властьрал ва ихтиярду дуруччай органнал каялувчитал. Бусравсса хъамаллуравух бия Дагъусттаннал культуралул министр Зарема Буттаева, Дагъусттаннал кIулшивуртту дулаврил ва элмулул министр ЯхIия Бучаев ва м.ц.

 
Концерт дайдирхьунни «Дагестан» тIисса паччахIлугърал балайлул ва къавтIаврил ансамбльданул ккаккан дурсса лезгинкалийну. Хъирив щаллу дунни Аьрасатнал ва Дагъусттаннал гимнру. Гьурттучитал барча буллалисса ихтилат бунни Вячеслав Буткол.
– Цалчин, ттун барчаллагь учин ччива Дагъусттан республикалул каялувчитурахь конкурсрал финалданул концерт МахIачкъалалив дансса сант руртун тIий, чIарав бавцIуну тIий. Мукунма барчаллагь тIий ура цинявппагу гьурттучитурахь, бигьа бакъасса пишалул ххуллий зий, къуллугърал буржругу лайкьну бартбигьлай, творчествалул ххуллийгу цивппа ккаккан бан бювхъусса, – увкунни ванал.
Цала ихтилатраву Дагъусттаннал премьер-министрнал кIицI лавгунни вайксса бусравсса хъамалгу кьамул бувну, укунсса даражалул конкурс жула республикалий даву ккалли бан бучIисса иш бушиву, му Аьрасатнал Халкьуннал цашиврул шинал давривугу цила тIилисин бушиву.
Конкурсрал гьурттучитурал ккакан бунни вокалданул, музыкалул инструментру бищаврил ва хореографиялул номерду. Дия личIи-личIисса номинацияртту. Аьрасатнал МЧС-рал хъунаманал тапшур бувну, Вячеслав Буткол дуллунни наградартту «Танцуй и пой» тIисса номинациялуву ххув хьуминнан ва призертуран.
«Авторская песня о профессиональной деятельности» номинациялуву ххув хьуминнан наградартту дуллунни МахIаммад Рамазановлул. «Голоса народов России» ва «Образ Родины в музыке» номинациярттаву хьхьичIунсса кIанттурду бувгьуминнан – ­Аьрасатнал Виричу Энвер Набиевлул ва Дагъусттаннал МЧС-рал Агьаммур управлениялул хъунама Муслим Девришбековлул.
Мероприятиялул сий гьаз дунни Къизлардал терский ансамбльданул щаллу бувсса Ватандалухасса балайлул. Гала-концертрал исват бунни Аьрасатнал МЧС-рал зузалт пишакаршиврул лавайсса даражалуцIун, творчествалул гьунардугу ххишалану буллусса бушиву.