Поэма

Лавгссия вагу талан
Жула Аьрасатнахлу,
Бурж бунутIий бивхьуну,
Талан Ватандалухлу.

Бюхъаншиврул жущава
Яхъанан ва дунъяллий,
Дакьаврий ва дусшиврий,
Паракьатсса оьрмулий.

НурмахIаммад десантник,
Аслансса талатала,
Душманнал лажиндарайн
Цувалу данди увксса.

Дагъусттанлув, зунтталчу,
Бюхттул барзунттал лачин,
Жандалий хIайп къакуну,
Гьалмахтал ххассал бувсса.

Аргъирайн биллалисса
Оьрму бяличIан бувну,
Ина вищала архIал
Пякь чин бувна душмантал.

ЦIуну бувсса чIивитIул
Яругу хьхьичI бавцIуна,
ЛухIи варсигу лавххун,
Бурттигьу ялун ивна…..

Цинявппа миллатирттан
Ина язисса арсра,
Оьсса душмантураща
Ватан дуручлай ивкIсса.

ЧIаку мурадран бувсса
Вила душнин-чIивитIун,
Интнил багъру тIутIаву
Аргъирай бикIаншиврул.

Бухьунссия вил душгу
Анавар буклай ляхъан,
Цила чаннасса симан
Ккаккан дан вин бахшишран.

ОьрчIру оьрмулул аргъри,
ЦIан хьхьуниву тIимурдур –
Вингу талихIну хьуссар,
Хъинбалдаран лявхъуссар.

Бюхттул барзунттал арсра,
ЦIанин лайкьсса къучагъра,
Нинугу, Ватангу вин –
Ца ххазинану бивкIссар.

Махъва-махъсса вил чагъар
МаччаначIан чивчусса,
БивкIссар ми ххирашиврул
Мукъурттил вибувцIусса.

Пухълуннал аманатран
Ина даччин къадурссар.
Нитти-буттал цIанийгу
Ттангъа хьун къаивкIссара.

Вил дакIниясса чаннал
Дуниял чанна лархъссар,
Цинявппа ппухълу вищал
Ца кьюкьлуву бавцIуссар.

«Гьура» тIисса вирттаврал
ЧIу бюхттулнийн гьаз хьуну,
«Гимн» хьуну, дунияллул,
Халкьуннавух ппив хьуссар.

АьтIисса цила ниттил
ЧIаврунная макь лихьлай,
Вил душ бур хIакьинугу
Нину паракьат дуллай.

– МааьтIурда ттул бавай,
Пахру бува буттая,
На вихра, аьзизсса ппу,
Абадлий сагъну уссар.

Виричунал чувшиврун
Багьа бищун къашайссар,
Бусаларду, саннарду
Вин хас дуллайна буссар.

Дагъусттаннал ссавруннайх
Кьурукьру лехлай буссар,
«Расуллул кьурукьирттал»
Кьюкьлувун ца ххи хьуссар.

Вил кIалабарзгу буссар
Бюхттул зунттал дяниву,
Вил ниттилгу ках чайссар
Вил суратрайх ттюнгъану.

Ппу – ххаллилсса полковник
Пахрулий ур уруглай,
ДакIниву къюву дуна,
ЧIалай ур кьянкьа дуллай.

Заннал чичру къучагънан,
ЦIанихсса духьунссия,
ЦIурттаву вил цIа чичин
Нясивну духьунссия.

Ппугу, арсгу – саллатIтал –
Дакьаврихлу талаталт,
Бюхттулсса Аьрасатнал
ЦIакьсса ттарцIруну хьусса.

Дунияллий оьрмулул
Дуцин личIи-личIиссар,
Виричушиву дуван
Ччи-ччинаща къашайссар.

НурмахIаммад вищагу
ХьунтIиссия яхъанан.
Зунттал марцIсса гьавалий
ТалихIрай кулпатращал.

Вил чувшиврул ттугълилу
БакIру хьхьичIун дирчуну,
БавцIуну бур вил дустал,
Вил аьралий гьалмахтал.

Вайннащал ца кьюкьлуву
Буссар буттал буттахъул –
ЯхI-къирият ирсирай
Тарихраву кьадиртсса.

Къалахланнав ниттихъул
ЛухIи-цIансса яннарду,
КъахъятIуннав къювулул
Вайннал алвагьсса дакIру.

Къабулланнав дяъвирдал
Ниттихъул арсваврацIа,
Къазехланнав арсругу
Ппухълуннаща дяъвирдал.
Шамай Къазанбиева,
яруссаннал «ХIакъикьат» кказитрал корреспондент
Таржума
Аминат АхIмадовал