Май зурул 13-нний МахIачкъалалив Поэзиялул театрдануву, дагъусттаннал литература гьаз давриву биялсса бутIа бусса яруссаннал чичу, драматург, журналист ГъазимахIаммад ГъалбацIов дакIнин утлатисса вечер дия. Ва увсса кьинисса даврил сиптачиталгу бия «Зунттал хъами» журналданул редакция ва Поэзиялул театр уртакьну.
Мероприятие дачин дурну бия кIицI лавгсса журналданул хъунмур редактор Хамис Шамилова ва литературовед, филологиялул элмурдал кандидат, ДГУ-рал оьрус литературалул кафедралул доцент Муса ХIажиев. Ва вечерданул ххуйшивугу му дия, ГъалбацIовлуя буслай, цIарду дуллай, укунсса, тукунсса чичур тIий, оьваннасса санаъру дуллай бакъаяча, аьдатрай, ванал мюрщисса хаварду ккалай, буниялттунгу гьунар бусса ушиву мунал творчествалийхчIин чIалачIи буллай бия.
«Зунттал хъами» журналданул коллективрал Дагъусттаннал халкьуннал сайки циняв мазурдийсса ванал мюрщи хаварду бувккуна сахIналийн лахълай. Лакку мазраймур хавар бувккуна лакку мазраймур журналданул редактор Аьжа АьбдурахIмановал. Гьай-гьай, буслай бия цаятува ГъазимахIаммадлуягу. Ванащал «Дагестан» РГВК-лий зий бивкIминнал бувсуна пишалул уртакь хIисаврай цукунсса ивкIссарив.
ГъазимахIаммадлул творчествалул куртIсса анализ дуллай ия лях-карах Муса ХIажиевлущал архIал Яруссаннал театрданул директор, чичу МахIаммад Бисавалиевгу.
Ккаккан дуллай бия ГъазимахIаммадлущалсса Хамис Шамиловал телеинтервьюгу, литературалул критик Камал Абуковлул ванал прозалун лайкьсса кьимат бишлашисса видеосюжетругу.
Гьаннайсса, залданувун бавтIцириннал хьхьичIун экрандалий унугу цува ГъазимахIаммад уклай ушиврувугу, ванал произведенияртту ккалай бушиврувугу дия цалуннасса ххуйшиву. Ярусса яру мазрай гъалгъатIий буссаксса, сийлий бикIантIиссар ванал чивчумур буккултраву.
ПатIимат Рамазанова
