Конституция кьамул даву – ихтиярдал паччахIлугърай демократия дишаврил ххуллий ца агьамсса иширан ккаллиссар. Мунияту чIявуми билаятирттай му кьини байран кунна кIицI лагайссар.

Дагъусттаннай Конституция кьамул дурну дур 1996-ку шинал июльданул 26-нний. Байрандалул агьамшиву хъанай дур Закон кьамул даву билаятирттангу, республикалунгу къабигьасса чIумал. Му кьамул даврийну бювхъуссар Дагъусттаннай дуруччин дакьаву, паракьатшиву, цашиву.
ЦIусса Конституция кьамул давривух гьуртту хьуну дур Дагъусттаннал ХIукумат ва Верховный Советрал Конституциялул комиссия, мукунма аьлимтал, правоведтал ва юристътал.
Билаятрай ва республикалий агьалинал ва политикалул аралуву хьусса дахханашивурттугу хIисавравун ларсун, 2003 шинал июльданул 10-нний Конституциялуву дурну дур цаппара дахханашивуртту ва кьамул дурну дур цIусса Конституция. Амма инсантурал гьар шинах ДР-лул Конституциялул кьини кIицI лагай июльданул 26-нний, му кьини кIицI даву аьдатравун дагьну дуну тIий.