«Дагестан» МЦК-лул Медициналул зузалтрал ассоциациялул гьар шинах кунна гьашинугу лавайсса даражалий кIицI ларгунни Медициналул зузалал кьини.
Гьашинусса шадлугъ Redisson теплоходрай дан пикри хьунни. Аьдатравун багьсса куццуй, ва кьини Ассоциациялул хьхьичIунсса хIакинтуран дуллунни ХIурматрал грамотартту ва Барчаллагьрал чагъарду.
Мероприятие тIитIлай, цинявппа барча бунни «Дагестан» МЦК-лул Медициналул зузалтрал ассоциациялул каялувчи Гулизар Башанаевал. Медициналул зузалт пишалул байрандалущал барча буллалисса ва миннал захIматран лавайсса кьимат бишлашисса ихтилат бунни «Дагестан» МЦК-лул президент академик Арсен ХIусайновлул. Ванал кIицI лавгунни Ассоциациялул хIакинтурал Аьрасатнал агьалинал цIуллу-сагъшиву дуруччаврил ххуллий лайкьсса кIану бувгьуну бушиву.
Совет Союзрал Виричу, генерал В. Маргеловлул цIанийсса Жагьилтал Ватан ххирану тарбия баврин ва хасъсса подразделениярттал ветерантуран кабакьу баврил фондрал дуллунни СВО-лул гьурттучитуран реабилитациялул кумаг баврихлу Гиппократлул орденну Лазерданул хирургиялул клиникалул хъунмур хIакин Тутубава Башанаеван ва Ассоциациялул каялувчи Гулизар Башанаеван.
В. Демиховлул клиникалул хIакин-анестезиолог МахIаммад ГъазимахIаммадовлун Медициналул ва фармацевтиялул организациярттал Миллатрал ассоциациялул чулуха дуллунни «Миллатрал медициналуву бивхьусса захIматрахлу» тIисса медаль.
Ассоциациялул хIакинтуран наградартту дуркIунни Дагъусттаннаягу. Республикалул ЦIуллу-сагъшиву дуруччаврил министерствалул чулуха 10 хIакиннан дуллунни ХIурматрал грамотартту ва Барчаллагьрал чагъарду.
Аьрасатнал хъун шагьрулий Дагъусттаннал цIа лайкьну дуручлачисса хIакинтурахь пишалул байрангу, хIалал дурсса наградарттугу барча тIий буру.

Андриана Аьбдуллаева