Майрал 6-нний Дагъусттаннал Халкьуннал Мажлисрал заседаниярттал залдануву ккаккан унни (представили) республикалул бакIчинал чIумуйсса кIанайма Федор Щукин.
Республикалул цIусса каялувчи ккаккан унни Аьрасатнал президентнал СКФО-райсса вакил Юрий Чайкал. Ванал бувккунни Федор Щукин къуллугърай итаврил хIакъиравусса Аьрасатнал президентнал хIукму. Яла ванал Сергей Меликовлухь барчаллагь увкунни дурсса давурттахлу.
«ДакI дарцIуну ура вил опыт ва профессионалшиву цIусса къуллугърай ивтсса чIумалгу аьркин хьуншиврий», – увкунни Юрий Чайкал. Дагъусттаннал бакIчинал чIумуйсса кIанайманахь маслихIат бунни Республикалий тIабиаьтрал биян бувсса зараллу бухлаган бувансса хIарачат буллан.
«Республикалул агьалинал оьрму ххуй-хъин бавур хъунмур мурад, му мурад бартлагаву умудрай агьали ялугьлантIиссар ина цIусса ххуллурду лякъинссар тIий», – увкунни Щукиннухь Юрий Чайкал.
Дагъусттаннал бакIчинал чIумуйсса кIанайма Федор Щукиннул увкунни: «ЦIанасса ппурттуву жула хьхьичIсса хъунмур масъала хъанахъиссар зарал бивсса цаягу инсан кумаг къабувну личIан къаитаву». Ванал тIимунийну, республикалийн бивсса апатIрал ялун личин бунни энергиялуцIун, щинацIун, газрацIун, ихтияр дакъа дурсса къатрацIун бавхIусса ва социал мяъна дусса проектру бартдигьаврицIун бавхIусса захIматсса масъаларттугу. Ванал тIимунийну, гьамин укунсса лахIзардаву яргну чIалан бикIайссар Дагъусттаннал цашиврул гуж. Дагъусттаннал бакIчинал кIанайманал оьвчаву дунни командалул давривух гьуртту хьун. Дагъусттаннаха къуллугъ буллан хIадурминнан хъуними принципруну хъанахъиссар тIайлашиву, аьчухшиву ва социал лифтру.
