Дагъусттаннай цIусса 14 школа ва 2 оьрчIал багъ тIитIинтIиссар сентябрьданул 1-нний. Вай тIитIин хIадур хъанай бушиврия бувсунни республикалул кIулшиву дулаврил ва элмулул министр ЯхIия Бучаевлул.

ЦIусса дуккаврил шинайнсса хIадуршинна цукун най дурив ххал дигьлагьисса совещаниялий Дагъусттаннал бакIчи Сергей Меликовлухь министрнал бувсунни гьануцIакулсса ремонт най душиву ялагу 9 школалий ва 2 садикрай, мукунма СПО-лул общежитиялул 2 корпусраву. Вай давурттугу чIумуй къуртал дувансса дирисса бущилий най душиву. Цаппара районнал кIанттул бюджетравасса школарду ремонт бувансса арцу личIи дуршивугу кIицI лавгунни, масалдаран, Гъуниннал райондалул.
ХIакьинусса кьини Дагъусттаннай зий бусса бур кIулшивуртту дуллалисса 2748 идара, вайннувугу 1381 школа ва 880 оьрчIансса багъ. Ми циняв цIусса дуккаврил шинайн хIадурну бусса-бакъасса акт цIакь дайсса дур муниципал комиссиялул. Август зурул 5-ннийнин 17 муниципалитетрал баян бувну бур цалва школарду ци тагьарданий буссарив, хIадуршинна цукунсса даражалий дуссарив.
Министрнал бувсунни ялагу август зурул 22-нний мюхчаншиву дуруччаврил тагьар ххал дигьлагьисса ученияртту дикIантIишиву циняв школардай ва садикирттай. Ва давугу щалвагу Аьрасатнаву дувантIишиву.
Сергей Меликовлул тапшур бунни школардал ва садикирттал хIадуршинна ххал дигьлагьисса цамур совещаниегу дуван Минстройрал ва районнал администрациярттал хъуниминнайн, вакилтурайнгу оьвкуну.

ПатIимат Рамазанова