Июнь зурул 13-нния 15-ннийн дияннин Дагъусттаннай, «Труд» стадиондалий, най дия ветерантурал дянивсса бадминтондалул Аьрасатнал чемпионат.
Жула республикалий цалчинни укунсса турнир хьусса. Шикку гьуртту хьунни 37 региондалиясса (Москавлия ва Москавуллал областьраясса, Татарстаннаясса, Челябинскалиясса, Магаданнал областьраясса, Норильскалиясса ва цаймигу кIанттурдаясса) 35+ ва 80+ оьрмулувусса 200-ннийн бивсса спортсментал, чIявуми – спортрал мастертал. Миннавух бия 30-нния ливчусса Дагъусттаннал спортсменталгу.
КIицI лаган, Дагъусттаннай бадминтонналухсса къулагъас ххишала дан, ва журалул спорт чялиш буккан бан махъсса шиннардий (2019-ку шиная шихуннай) хъуннасса даву дурссар Дагъусттаннал бадминтондалул федерациялул правлениялул председатель, Аьрасатнал бадминтондалул национал федерациялул советрал Ухссавнил Ккавкказуллал федерал округрайсса уполномоченный, цIа дурксса хIакин, челюстно-лицевой хирург, медициналул элмурдал доктор Жаруллагь Аьшуевлул. Ванал хIарачатрайнур ва цIанасса чемпионатгу Дагъусттаннай тIайла дурксса.
Турнир тIиртIунни шадлугърал даражалий, «Хасавюрт» ансамбльданул авурсса къавтIаврийну. Спортсментал барча буллалисса, ва журалул спортрал ляличIишиврия бусласисса ихтилатру бунни чемпионат тIитIлатIиний ва мунияр махъ хьусса конференциялий Дагъусттаннал ХIукуматрал председатель Аьбдулмуслим Аьбдулмуслимовлул, Аьрасатнал бадминтондалул федерациялул председатель Андрей Антроповлул, ванал хъиривчу, Москавуллал областьрал бадминтондалул федерациялул каялувчи Виктор Прониннул, Дагъусттаннал спортрал министр Сажид Сажидовлул, Жаруллагь Аьшуевлул ва Дагъусттаннал бадминтондалул хъунама тренер Шамил Бегаловлул. Бусравсса хъамаллуравух ия Пакистаннал бадминтондалул федерациялул президент Ваджид Аьлигу.
Чемпионатрал лагрулий Аьбдулмуслим Аьбдулмуслимовлул ва Андрей Антроповлул кьутIи дунни бадминтон Дагъусттаннай школалул программалувун рутан. ЦIусса дуккаврил шинайнин Дагъусттаннай тIитIинтIисса 20 школалий агьаммур спортну бадминтон бикIантIиссар.
Бадминтон Дагъусттаннай дахьва-дахьва чялиш буклакисса спорт бунугу, жула спортсментурал хьхьичIунсса кIанттурду бувгьунни. Арцул медаль ларсунни ХьурукIратусса, МахIачкъалалив ялапар хъанахъисса МахIаммад ХIажиевлул (65+). КIицI лаган, финалданий ванаяр ххув хьусса Ставрополлаясса Эльдар Сулаймановлулгу мархри Дагъусттаннаясса бур.
Чутсса разрядраву кIилчинсса ва цувалу увккун шамилчинсса кIану бувгьунни Дагъусттаннал Аграрный университетрал кафедралул хъунама, профессор, Читтуратусса Сиражуттин Кьурбановлул (70+).
Ххув хьусса ва хьхьичIунсса кIанттурду бувгьусса спортсментуран буллунни дипломру, медаллу ва кубокру.
– Жула оьрчIру телефонная арх баву, цIуллу-сагъсса оьрмулийн кIункIу баву, спортрахун бичаву мурадрай, ттун ччан бивкIунни Дагъусттаннай бадминтон чялиш буккан бан. Му пикрилий, на цаппара районнайнгу ивра. ДукIу лавгссияв Лакрал райондалийнгу. Юсуп ХIамидовичлущал хьунаавкьуну, ттула мурад бувсъссия. Жуламур райондалух ххишаласса къулагъас дан ччива. Бурганну цукун шайрив. ЦIана бадминтондалул секция тIивтIуну буссар «Каспий» академиялуву, Дагъусттаннал университетраву, Сапижат Мазаевал каялувшиннаралусса МахIачкъалаллал №54 школалий, жула лаккудуш Альбина Шутуновал каялувшиннаралусса гьунар бусса оьрчIансса лицей-интернатрай. Уттиния тихунмайгу ва спорт чялиш буккан буллантIиссару Дагъусттаннай. Пикри буссар мушакъатминнал дянивгу бан бадминтондалул бяст-ччал (парабадминтон). Вайннавух бикIантIиссар хасъсса аьралий операциялул гьурттучиталгу. Миннансса тренергу увцуну бучIантIиссару Москавлия. Вихну ура та-бунугу ва спортравугу дагъусттанлувтал Аьрасатналгу, дунияллулгу чемпионтал хьуншиврий. Ва ляличIисса журалул спортри, ци оьрмулувусса ухьурчагу, инсаннал цIуллу-сагъшиврун, хаснува янил чаннан, хъунмасса хайр бусса. Летчик-космонавтътал хIадур байсса программалуву бадминтон агьаммур спортну ккаккан бувну буссар.
ЧIирисса, дахьра 4 грамм кIушиврул дусса, волан дунияллий яла анаварну леххаймур (скоростной) спортрал снаряд хIисаврай Гиннеслул рекордирттал луттиравун дагьну дуссар, – гъирарай буслай ур Жаруллагь цала оьтту-ттурчIавун бувхсса спортрая.
Дагъусттаннай Аьрасатнал чемпионатгу тIайла дурккун, хъиривсса кьинирдай Аьрасатнал бадминтондалул Национал федерациялул чулуха Жаруллагь гьуртту хьунни Санкт-Петербурглив дунияллул халкьуннал дянивсса экономикалул форумрал лагрулий хьусса Аьрасатнал ва Индонезиянал дянивсса бадминтондалул бяст-ччаллай.
– Экономикалул форумрай Дагъусттанная хъунмасса делегация бия, ХIукуматрал Председатель Аьбдулмуслим Аьбдулмуслимовлуя тIайла хьуну. Ттулмур иш бадминтондалущал бухьувкун, на «Территория спорта» тIимур залдануву уссияв. Гужсса бяст-ччал хьунни Индонезиянал ва Аьрасатнал спортсментурал дянив. Шикку на кIул хьура Индонезиянал бадминтондалул олимпий чемпион, цIана ва хIукуматрал спортрал министрнал хъиривчусса Тауфик Хидаятлущал. Оьвчав ванайн Дагъусттаннайн. УчIанмур банна увкунни. Буруганну, – буслай ур Жаруллагь.
ДакIниймур бартлаганнав, дуллалимуниву Зал архIал изаннав.
Андриана Аьбдуллаева
