«Хасаевские чтения»
Декабрьданул 12-нний Республикалул клиникалул А.В. Вишневскийл цIанийсса азарханалул хирургиялул корпусраву хьунни Аьрасатнал терапевтътурал элмийсса медициналул обществалул Дагъусттанналмур отделениялул батIаву – профессор Хасаев АхIмад Щайховичлул аьпалунсса «Хасаевские чтения».
БатIаврий гьурттушинна дурунни ларай кIицI ларгсса обществалул (ДРО РНМОТ) председатель, профессор Сулайман Маммаевлул, ДР-лул ГБУ-лул хъунама хIакиннал хъиривчу Сабибулла Аьбдуллаевлул, доцент, госпиталь терапиялул кафедралул заведующийнал буржру биттур буллалисса Жамиля Оьмаровал, республикалул шагьрурдая ва районная бувкIсса терапевтътурал, ординатортурал ва студентътурал.
– Профессор Хасаев мудангу итталу икIайва хIакиннал гьарта-гьарзасса кругозорданийну, кIулшивурттал хъинну хъуннасса луртандалийну, къашайшалт хъин баврил цIу-цIусса кьяйдардайнсса хъит тIутIаврийну. Хаснуварив кIицI лаган ччива АхIмад Щайховичлул хасиятраву диркIшиву инсаншиврул язими лишанну. ХIакин – му анжагъ пиша бакъар, му, хьхьичIва-хьхьичI, цалла жандалий хIайп къакуну, дусса чIунгу, гужгу цайминнан харж буллалисса, цала ялув цува авцIуну, цалнияр цал кIулшивуртту куртI дуллалисса миссияр. Гьамин вай цимурцагу, ца ххишалагу дия АхIмад Щайховичлуву. Му ия, дарурттайну бакъа, мукъуйнугу хъин буллалисса хIакин. Ва бия ванал оьрму, ялапаршиндарал кьарал – цувагу чанна лавхъун, цайминнангу чани буллалисса, цавурасса гъилишиврул лагма-ялттумигу гъили буллалисса. Ва ия элмулул захIматчи, хъамаитан къашайсса учитель, – увкуна Сулайман Маммаевлул цала хьхьичIмукъуву.
АхIмад Хасаев дакIнин утлатисса дакIнийхтунусса ихтилатру бувна цайминналгу.
Гихуннайсса даврил лагрулий элмийсса докладру бувминнавух бия профессортал А.Г. Малявин (ш. Москав) ва С.Н. Маммаев (ш.МахIачкъала), Республикалул Клиникалул азарханалул гематологиялул отделениялул хъунмур З.К. Къарабудагъова ва цаймигу.
Конференция элмулул ва методикалул чулухасса лавайсса даражалий хьунни.
Бадрижамал Аьлиева
