Вай гьантрай щалагу жула билаятрай бюхттулсса даражалий кIицI ларгунни Буттал кIанттул цIанийсса Хъунмасса дяъвилий Ххувшаву ларсун 80 шин бартлаглагисса байран.
Май зурул 8-нний лахъа-хъунну кIицI дунни Ххувшаврил байран Ккурккуллал шяравугу. КIюрххила шяравух баллай бия жула халкьуннан нукIува ххира хьусса аьралий балайрду. Шяраваллил майдан чIюлу бувну бия байрандалун хасну. Шадлугърал мажлисрай гьуртту хьун бувкIун бия Лакрал райондалул бакIчи Юсуп МахIаммадов, Дагъусттаннал Халкьуннал Мажлисрал депутат Марат Илиясов, Ккуллал ва Лакрал районнал аьралий комиссар Аьли ГъазимахIаммадов, Хъун дяъвилул гьурттучи, кIира Славалул ордендалул заллу Ссунгъур Ссунгъуровлул арс МахIаммад, Лакрал райондалул Культуралул центрданул хъунама Ансар Къажлаев. Бусравсса хъамаллурал, Ккурккуллал шаэр Ханича Аьлиевал, школалул директор Кьурбан Гъужиевлул бунни тай захIматсса дяъвилул шиннардия, та дяъвилий лакрал вирттаврал ккаккан дусса чувшиврия, хIакьину хасъсса аьралий операциялий Ватандалул мурадру буручлай къучагъсса ттаттахъал ирс лайкьну буручлачисса аьралийтурая бусласисса ихтилатру.
Дачин дурну бия мероприятие Ккурккуллал шяраваллил администратор Тамерлан Аьлиев ва школалул учительница Оксана Гъужиева.
Шадлугърал мажлисрал лагрулий ва кьини шяраву тIиртIунни дяъвилул гьурттучитурал аьпа абад буллалисса цIусса гьайкал. Шикку ххи хьунни хьхьичIмур гьайкалданий къадиркIсса цаппара цIарду. Ккурккуллал шярава дяъвилийн лавгун ур 134 инсан, зана къавхьуну ур 64.
Гьайкал тIитIин вихшала дунни Юсуп МахIаммадовлуйн, Марат Илиясовлуйн ва дуклаки оьрчIайн. Хъамаллурал ва дуклаки оьрчIал дирхьунни гьайкалдануцI тIутIив. Жяматгу байрандалущал барча бувну, Юсуп МахIаммадовлул бувсунни Буттал кIанттул цIанийсса Хъунмасса дяъви байбивхьукун, Ватан душманная дуруччин 6 азарунния ливчусса лакрал чиваркI лавгшиву, минная бачIи зана къавхьушиву. Ванал барчаллагь увкунни, райондалулгу, шяраваллилгу администрациярттащалгу, жяматращалгу маслихIат ккавккун, ва ххаллилсса гьайкал дан бакIрайн лавсъсса меценат СалихI ХIажиевлухь, вава куццуй цала сипталий хьхьичIмур гьайкал дурсса Сулайман Сулаймановлухь, хIурматрай дакIнин увтунни чIярусса шиннардий Ккурккуллал шяраву Ххувшаврил парадгу, «БивкIу бакъасса полкрал» акциягу лавайсса даражалий хIадур дуллай ивкIсса ххаллилсса педагог, шаэр, жяматийсса ишккакку Даниял Магьдиев.
– Ца-кIира шинал хьхьичI, Ххувшаврил байран кIицI лаглагисса чIумал, жува бикIайссияв так ва 9-мур майрайсса Ххувшаврил байрандалия гъалгъа тIий личIаннав жува, цамур дяъви къаккакканнав тIий. Цуксса жунма къаччайнугу, уттигу душманнайн данди бацIансса бувккунни. Уттигу ца ххувшаврил байран кIицI дуллансса бувккунни, – увкунни Юсуп МахIаммадовлул, хасъсса аьралий операциялийгу жува ххув хьуншиврийн щак бакъашиву кIицI лаглай.
Ххувшаврил байрандалул лагрулий хьунни мукьцIалла шинал хьхьичIра, 1985-ку шинал, Даниял Магьдиевлул сипталий дайдирхьуну, аьдатравун дагьсса «БивкIу бакъасса полкрал» акция. КIицI лаган, ва акция райондалийгу, республикалийгу хьхьичIра-хьхьичI Ккурккуллал шяравур дуллан бивкIсса.
