Лакрал райондалий хьунни щала билаятрай гьаршинал Ххувшаврил байрандалул хьунийн шайсса аьдатравун багьсса «Вахта Памяти».
Ваний гьуртту хьунни райондалул бакIчи Зураб Куччаев, ванал хъиривчу Малик ХIусманов, аьралий комиссар Аьли ГъазимахIаммадов, Хъунайннал школалул директор МахIаммад Хъунбуттаев, хасъсса аьралий операциялийн багьайсса суаллалсса буллалисса райондалул бакIчинал кумагчи Ярагъи Дандамаев, хасъсса аьралий операциялул гьурттучи Хайруттин Гъазиев, чIава аьралийтал, аьралий комиссариатрал вакилтал, идарарттал зузалт ва дуклаки оьрчIру.
«Аьпалул вахта» тIивтIунни Буттал кIанттул цIанийсса Хъунмасса дяъвилия зана къавхьуминнан дацIан дурсса гьайкалдануцI тIутIал шалкри бишаврия.
Зураб Куччаевлул кIицI лавгунни ватан душманная дуручлай бивкIсса вирттаврал аьпа ябаврил агьамшиву, жула билаятрал тарих хъирив нанисса никирал пахрулун лайкьсса бушиву.
«Ялун най дур 9-мур Майрал байран ва жува кIицI лаглан тIий буру Буттал кIанттул цIанийсса Хъун дяъвилий совет агьалинал ларсъсса Ххувшаву. Жула билаятран ва ляличIисса датар – ватандалул ххуллий жанну дуллуминнаясса аьпари, жула тарихри», – увкунни ванал.
Душман ххит уллай, жанну кьурван дурминнал аьпа ябаврил ххуллийсса «Аьпалул вахта» акциялул агьамшиврия ихтилатру бунни Аьли ГъазимахIаммадовлул, Хайруттин Гъазиевлул, МахIаммад Хъунбуттаевлул.
Ахирданий ватандалул ххуллий жанну дуллуми дакIнин бичин ца минутрайсса пахъгу багьну, райондалул имам ХIабиб Батталовлул бувккунни кьулгьу-алхIам. Гъумучиял оьрчIал магьирлугърал школалул тарбиялувтурал дурккунни ватандалухасса ва аьралий темалун хас дурсса назмурду.
Зулайхат Тахакьаева
