Мартрал 16-нний жу «Илчилул» хъунама редакторнащал лавгру ЦIуссалакрал райондалул ЦIуссаминалийн, яла райондалийнгу, бувчIавуртту нанаврил хIалкьазия ххал дуван.
«Новостройрал» хъунмур идаралий бия ТИК-лул хъунмур пункт. Шикку бия райондалул циняв УИК-ирдай каялувшиву дуллай ТИК-лул председатель Аьли Исрапилов ва цаймигу зузалт.
Ванал бусаврийну, бувчIавуртту ххуйну най дия, халкь чIурду булун занай бия, аварасса ишру хьуну бакъая.
Яла бувкIру ЦIуссаминалийсса Чапаево шяраваллил школалийсса АхIмадхановуллал УИК-райн. Ванил председатель Жамал МахIаммадовлул бусаврийну, жу бияннин чIурду булун цалсса бувкIун бия 450-ннаха ливчусса, ялагу найнма бия. Шикку цаламур чIу буллуна Артур Исрапиловлул. СияхIирттайну чIурду булун аьркинну бия 1241 инсаннал, булун тIий бур сайки 90-95 процент жяматрал.
Шиккува жу кIул хьуру Чапаево шяравасса хасъсса аьралий операциялул гьурттучи, цIунцIияртту хьуну, хъин хъанахъисса Кьабиев ХIусайннущал.
ЦIуссаминалия, бувкIру ЦIусссалакрал райондалийн. Хьунабавкьуру райондалул бакIчи МаматIи ХIамзатовлущал. Ванал бувсуна райондалийсса бувчIавурттаяту: 15 ссятраву чIурду буллуну бур 46 % райондалул жяматрал, бувчIавурттай аварасса ишру хьуну бакъар. Лавгру ЦIуссалакрал шяраваллил УИК- райнгу. Тиккусса чIурду булаврил тагьардания бувсуна райондалул Жяматийсса советрал председатель Зайнулла Мирзоевлул.
