Ларгсса нюжмардий Казбековский райондалий шадлугърал тагьарданий тIивтIунни цIусса щинаххуллурду. Шикку гьуртту хьунни Дагъусттан Республикалул ХIукуматрал председатель Аьбдулмуслим Аьбдулмуслимовгу.

Ва кьини райондалий тIивтIуна «Жилье и городская среда» национал проектрал «Чистая вода» федерал проектрал лагрулий бувсса кIива объект. Ца – Дылым шяравунсса (кIилчинмур этап), вамур – Акташ неххая Алмак, Буртунай, Дылым, Гуни, Гостала, Инчха шяраваллавунсса. Цалчинмур щинаххуллул лахъишиву дур 34, 1 километра, кIилчинмунилсса – 48 километра.

Райондалул бакIчи ХIажимурад Мусаевлущал ва цаймигу къуллугъчитуращал Аьбдулмуслим Аьбдулмуслимов цIуну щин дурцусса Ишхойлам кIанттурдал ялтту увккуна. Барчаллагь увкуна райондалул 6 шяраваллин – 30 азарунния ливчусса инсантуран, аьркинсса щиналсса буллай зий бивкIсса цинявннахьвагу.
Мяйжаннугу щинал масъала ва райондалий цIюрувкьуминнувух бивкIссар цикссагу шиннардий. Район неххал чIарав дунугу, щинмур диял хъанай къадиркIссар. Шикку ялапар хъанахъисса инсантурал бусаврийн бувну, диркIун дур чIунну

Дылым шяравун щар хьусса, КIундиннал шяравасса Гулистан ХIажиева ва иширая укун буслай бур:
– Дылым шяраву ялапар хъанай ттул мяйра шинни, мяйрагу шинай щинацIун бавхIусса масъала щаллу къабувнува личIлай бия. Ца кьини ца махIлалий, вамур кьини вамур махIлалий дулайва.

Шайва чIунну шанма гьантлий щин къадуллуссагума. Кьини ляхну щин дуллалисса чIумалгу, дулайва ахттайннай, лакьайва ахттакьуннай, инсантал, давурттай, миву-тиву буну, шаппа бакъа, му чIумалгу щинал луртан дуван къархьуну личIайва чIявуми. ДакIнийри, шанна нюжмардий щин дакъасса чIунгума хьуссия, ласнал нину-ппу ялапар хъанахъисса цалчинмур зивулий дахьра кIунтIа тIий най, жучIан кIилчинмур зивулийн дурагу къалахълай щин. ЦIусса щинаххуллу бувну яла ххаримур на бухьунссара, муксса бувххун, багьтIатI хьуну буссияв на ва ишираву.

Бадрижамал Аьлиева