Гъумук паччахI-ххуллуцIсса Вирттаврал чIирай тIиртIунни хасъсса аьралий операциялий жан дуллусса Аьрасатнал Виричу Фархад Худайнатовлул аьпалул ула.
Мероприятиялий гьуртту хьунни Лакрал райондалул бакIчи Юсуп МахIаммадов, ДР-лул Халкьуннал Мажлисрал депутат Марат Илиясов, аьралий комиссар Аьли ГъазимахIаммадов, прокурор ХIусайн Аьлилов, хасъсса аьралий операциялул гьурттучитал, ЦIийшиял шяраваллил бакIчи Макьсуд Макьсудов, Виричунал гъан-маччами.
Юсуп МахIаммадовлул кIицI лавгунни ватандалул ххуллий жан дуллуминнал аьпа абад баврил агьамшиву.
«Жува барчаллагьрай буру ватандалул мурадру буруччаврил ххуллий талатиминнайн, аьралий иширттаву арсру ва гъанчу ливтIуминнайн. ТачIав дакIния къабуккантIиссар жунма жула вирттал, ватандалийн дакI тIайлану талай бивкIми», – увкунни ванал.
Макьсуд Макьсудовлул дакIнин бивчунни Виричунал оьрмулул яргми ххару.
Аьпалул улттуя пардав лирккунни Аьли ГъазимахIаммадовлул ва хасъсса аьралий операциялул гьурттучи Хайруттин Гъазиевлул.
Фархад Худайнатов увну ур 1985 шинал Каспийск шагьрулий. Гьуртту хьуну ур Ухссавнил Ккавкказнавусса ва Сириянавусса аьралий иширттаву. 2013 шиная шийнай къуллугъ буллай ивкIун ур Кьиблалул аьралий округрал хасъсса подразделениялий. Талатавриву ккаккан дурсса къучагъшивурттахлу лайкь хьуну ур Жуковлул медальданун, Чувшиврул ордендалун.
