МахIачкъалаллал Хъун майданнив хьунни аьдатравун дагьсса «Огненные картины войны» тIисса, Буттал кIанттул цIанийсса Хъунмасса дяъви байбивхьуну 85 шин шаврин ва Аьпалул ва хажалатрал кьинилун хас дурсса акция.

Акциялул сакиншинначи хьунни Дагъусттаннал Жагьилтурал иширттал министерство. Ва кьини дяъвилий жанну дуллусса вирттаврал аьпалун лавхъунни 20 азарва хъамул чирахъ. Вайннуй волонтертурал ва акциялул гьурттучитурал ккаккан дунни дяъвилул сурат: кIия аьскар – Аьрасатнал Виричу АьбдулхIаким Исмяилов ва хасъсса аьралий операциялул талатала архIал гьаз буллай бур Ххувшаврил ттугъ.
МяйцIаллий ххюра шинал хьхьичI байбивхьуну бур Буттал кIанттул цIанийсса Хъунмасса дяъви. Дяъвилул майданнай, партизантурал кьюкьраву талай, концлагерьдай, блокадалуву, къинттуллух захIмат буллай жанну дуллуну дур миллионну жула ватанлувтурал. Бюхттулсса Ххувшаву гъан дан хъунмасса захIматрал бутIа бивхьуссар ттуршазарахъул дагъусттанлувтуралгу. Ми жунма мудан дакIний бикIантIиссар. Та дяъвилий ххувшаву ларсъминнал ирс ябуллай, хIакьинусса кьинигу хасъсса аьралий операциялий Ватандалул мурадру буручлай, чувшиву ккаккан дуллай бур жула аьралийтал.
«Акциялий гьуртту хьунни «Единая Россия» партиялул региондалул отделениялул, «Цалчинминнал Суккушиннарал», «Юнармиялул», «Молодая гвардиялул», волонтертурал цачIушиннардал вакилтал, хасъсса аьралий операциялул гьурттучитал, республикалул агьали. «Жу гьарица шинах дайссар ва мероприятие, жула тарих дакIний битаву, жагьилсса никиран совет халкьуннал чувшиврия кIулну бикIаву мурадрай», – кIицI лавгунни Дагъусттаннал жагьилтурал иширттал министрнан кIанайсса Камил Саэдовлул.
Андриана Аьбдуллаева