Майрал 18-нний МахIачкъалалив Расул ХIамзатовлул цIанийсса Миллатрал библиотекалуву хьунни «Сила духа народа-победителя. Завещание потомкам» тIисса луттирал презентация.

Шикку гьуртту хьунни ДР-лул Халкьуннал Мажлисрал председательнал хъиривчу, «Справедливая Россия – За правду» фракциялул каялувчи Камил Давдиев, ДР-лул Халкьуннал Мажлисрал Культуралул, жагьилтурал иширттал, спортрал ва туризмалул комитетрал председатель Мурат Пайзуллаев, ДР-лул Халкьуннал Мажлисрал депутат Марат Аьлияров, Ветерантурал ва хасъсса аьралий операциялул гьурттучитурал иширттал комитетрал председательнал хъиривчу Шамил Оьмаров, ДР-лул Халкьуннал МажлисрачIасса жагьилтурал парламентрал активистътал, республикалул шагьрурдал ва районнал мажлисирттал депутатътал.
Камил Давдиевлул бувсунни Ххувшаврил 80 шинал юбилейран хас бувсса «Сила духа народа-победителя» тIисса лу итабавкьушиву партиялул председатель Сергей Мироновлул сипталийн бувну.
Луттираву буслай бур Буттал кIанттул цIанийсса Хъун дяъвилий чувшиврий кьинирду лархъсса къучагътурая. Автортурал ва архIал лу сакин бу­ллай бивкIминнал цачIун бувну бур уттинин чувчIав бивщуну къабивкIсса Хъун дяъвилул гьурттучитурал архивравасса документру.
– Луттирал презентация хъанахъиссар Ххувшаврил 80 шинал юбилейрал лагрулий партиялул дачин дурну диркIсса давурттал хъиривмур бутIану. Партиялул вакилтурал, видеороликру дурну, буслай буссия Хъун дяъвилий душманная Ватан дуручлай бивкIсса цала мачча-гъанная. Луттирал цумур чIапIи рутарчангу, аьлтту хъанай дур жула аьралуннал дазу-зума дакъасса чувшиву. ХIакьинугу, Ватандалул мюхчаншиву дуруччаврил масъалартту гьаз хьусса ппурттуву, Вирттаврал цIарду абадлий ядаву мурадрай итабавкьусса луттирал хъуннасса агьамшиву дуссар, – увкунни Давдиевлул.
Хъирив ихтилат бунни «Наши герои – люди из стали» тIисса патриот суккушиндарал каялувчинал хъиривчу, 1999 шиналсса дяъвилул иширттал ветеран, полковник Алик Апандиевлул. Ванал кIицI лавгуна цIуну итабавкьусса лу оьрчIру Ватан ххирану тарбия баву мурадрай­сса хъанахъишиву ва му цума-цагу инсаннал ужагърай бикIан лайкьсса бушиву. ХIакьинусса кьини Алик МухIуттиновичлул кIия арс ур хасъсса аьралий операциялий гьуртту хъанай. Жагьилсса ник патриот зумуну тарбия даврихлу бивхьусса захIматрахлу Камил Давдиевлун дуллунни «Честь и Слава Дагестана» тIисса медаль.
Луттиран лавайсса кьимат бишлашисса ва Буттал кIанттул цIанийсса Хъун дяъвилул ва хасъсса аьралий операциялул мурадру ца­сса бушиву тасттикь буллалисса ихтилатру бунни Дагъусттаннал Оьрмулунсса дузалшиннарду дуллалисса профсоюзрал комитетрал председатель АьбдурахIман Адамовлул, Нефтегазовый колледжрал каялувчи Аьлишер КьурбанмахIаммадовлул, Миллатрал библиотекалул директорнал хъиривмур Сарат Аьбдуллаевал.
– Ва хъанай бур жула буттал бу­ттахъал къучагъшивуртту абад дуллалисса лу. Яла-яла жула ирсирахь Хъун дяъвилул тарихрая мяйжанмур бусласисса, – увкунни «Молодежь СПРАВЕДЛИВОЙ РОССИИ» тIисса суккушиндарал отделениялул Дагъусттаннайсса председатель Агъа­лар Юзбековлул .
Ахирданий Камил Давдиевлул вай ххаллилсса луттирду пиш-каш бунни мероприятиялийн бувкIминнан.

Имара Саидова