ЧIурттащиял агьалинал бусрав-барчаллагьрай кьамул дувансса ца уттигу ххаллилсса даву дунни Мариян Илиясовал цIанийсса «Дараччи» фондрал хъунмур Гульшан Хасаевал. Цилва шяравудуш Амаева Халисатлущал уртакьну дунияллийн бу­ккан бунни Буттал кIанттул цIанийсса Хъунмасса дяъвилий гьуртту хьуминнаясса «ЧIурттащиял абадул лама!» («Вечный огонь Чуртаха») тIисса лу. 
 

Ва чIярусса шиннардийсса хъунмасса захIматри. Гульшан Хасаева ччянива байбивхьуна фронтовиктурая чичлай социал сетирдай. Цаппара макьаларду ванил «Илчилийнгу» гьан дувайва.
«Ххюра шинни ттул ва луттираха зий, хъунмасса кумаг бунни Амаева Халисатлул материал датIин. ЧIун дур, дакъар къакуну, тIааьн бакъа бура-бакъара къакуну, информациялул хъирив багьну бивкIунни. Шайкун хIарачат бунни. Кувний, гьай-гьай, инсаннал оьрмулия шанма-мукьва хха чичиншиврул биялсса инсантурачIан оьвчингу, хьунабакьингу багьайва. Ттун анжагъ аьралий оьрмулия чичин ччай бакъаяча, кулпатирттал, тухумирттал тарихрая балжину бусан ччай бия. Уттисса никирангу, ялун бучIантIиминнангу цивппа цукунсса ппухълуннал варистал буссарив кIулну бикIаншиврул. Материаллу, документру батIлай, агьалинащал хьунабакьлакьисса ппурттуву буттал, ттаттал сурат къаккаркссар, миннал оьрмулул хIакъираву цичIав къакIулссар тIиссагу шайва. Хъунмасса кумаг хьунни ттун Магьдиев ­Аьлиллул луттираягу, Мудуев Раппанинал чичрурдаягу, фронтовиктурал оьрмулия Давыдов ХIусайннул бувсса докладраягу, шяраваллил тарих ххуйну кIулсса ласнал ниттия Хасаева Зайнаблуягу, 93 шинал оьрмулувусса», – буслай бур Гульшан Хасаева.

 
Ванил увкумунийн ххи банна, хIатта ца кулпатрал, ца тухумрал тарихравагума миллатрал тарих аьч хъанан бикIайшиву. Луттирал лажинтирттай куннан цала маччачунал оьрмулия щаллу-ккурккисса бутIа бакIрайн багьантIиссар, куннангу кутIасса биография. Куннахь тIурчарив, дурагу дусса ца суратралгума чIявусса затру бусантIиссар. Ва ялагу, фронтовиктурая, захIматрал фронтрайминная, «дяъвилул оьрчIая» бусаврийну, мийн-тийн бакъа, щаллусса шяраваллил летопись хъанахъиссар. Та заманнул суратру итталух гьанантIиссар. Бусалардал барт ттирихIинтIиссар.
Лу цуппагу кьянкьасса мужаллат дусса, марцI-кIяласса чагъарданий бивщусса, лахъисса оьрмулий яхI бувансса бур. Гьарцагу кулпатрал ядигарну ябулланссар тIисса умудгу бур.
ЧIурттащиял шяраваллил фондрайгу каялувшиву дуллалисса, шяраваллил жяматран уттинингу хъуни-хъунисса хъинбаларду бувсса Гульшан Хасаевал цаймигу дунни ва дуллайнма бур агьалинал барчаллагьрансса давуртту. Миннуя бусангу яржа биянтIиссар.

ПатIимат Рамазанова