[dropcap]Г[/dropcap]ьашинусса цIусса дуккаврил шин тIитIаврин хасъсса шадлугърал батIаврий Бабаюртуллал райондалийсса КIамахъаллал шяраву Сангардай дия ляличIисса уттарашинна. Аьдатрайн бувну, школалул хьхьичIсса майданнив бавтIун бия тIутIащалсса, шардащалсса дуклаки оьрчIру, учительтал ва нину-ппу. Дуклаки оьрчIацIун школалул хIаят чIюлу дурну дия тяхъасса мюрщулт­рал ххарисса чIурдалгу.

Залму АьбдурахIманова
Дия щарнил чIивитIулт ххари хьунсса хъуннасса сававгу. Шяраву ва кьини вай кьамул бан, цалчин нузкьунтту тIитIин, хIадурну бия оьрчIансса садик. ЦIусса къат­ри дансса кашигу дакъахьувкун, школалул цала гужирацIух, залуннахьгу цIувххуну, дакьин дурну, цIу дурну дия щарнил дянивсса, цукIуй якъахъанахъисса къатри.
БатIаву къуртал хьувкун, мюрщултрал кьюкьа, каругу дургьуну, бувкIуна чIюлу дурсса садик­рал хIаятравун. Вайннал ххаришиврул дазу-зума дакъая. Цаннащал ца кIул хъанай, цаннахь ца вечI-вечI тIисса чIелмулт кунма, лечлай, гьанай, къавтIий бия. Сангардал школалул директор Магинора АхIмадовал бусаврийну, оьрчIансса садик тIитIаврийну шяраву 5 инсаннансса зузи кIану хьуну бур. Шивун занантIиссар 3 шин хьуну, дарсирайн гьан хьхьичIсса чIумувусса оьрчIру. Садикрайн, Сангардаясса чIивитIулт бакъа­сса, цала оьрчIру бувцуну букIлан тIий бусса бур КIундиятусса, ГьунчIукьатIатусса, чIаххув­райсса нугъайнал Тамаза-Тюбелиясса цаппара нину-ппухълунналгу.
Сангардал школа, аривсса цаймигу школарду кунма, багьай­ссар Къизилюртуллал ТУО-райн. Вайнналгу цала чулуха цалсса садикран буллуну бия оьрчIру уттубишавансса тахру. Гихунмайгу ва цIуну тIивтIусса садикран шайнал цала чулухасса кумаг банхьуви: мюрщултрал чIун гьан дан, къакIулмур лахьхьин бан къааьркинссарагу къадикIайхха, игрушкарттая тIайла хьуну, луттирдайн, кьалантирттайн бияннин.
Сангардал школалул учительтуран ва дуклаки оьрчIан бакъа­сса, садикрал зузалтран ва мюрщултрангу, барча буллай, чIа учин ччай бур тIайлабацIу ва цIуллушиву.