Республикалул оьрчIансса «Орлёнок-Дагестан» кказитрал редакциялул ОьрчIру буруччаврил кьинилун хасну ЧIава корреспондентътурал слёт дунни Печатьрал къатлуву.
Ва дайдирхьуна уттигъанну дунияллия лавгсса, гьунар бусса журналист Алик АьбдулхIамидов дакIнин утаврийну. Дагъусттаннал Печатьрал ва информациялул агентствалул хъунама Арсен Юсуповлул цIанияту ванал хъиривчу Рустам Жалаковлул оьрчIру барча буллай, кIицI лавгунни укунсса мероприятиярттал оьрчIаву чичлансса гъира ххи буллалишиву.
«Жу ттиния тинмайгу оьрчIру кIункIу булланну журналистикалувун, пресс-конференциярттай гьуртту хъанан, чялишну информациялул дунияллий щурун. Ва опытрал кумаг бувантIиссар оьрчIан цалва оьрмулул ххуллу язи бугьан, медиалул дунияллий цIакь хьун», – увкунни ванал. ОьрчIал ва школалул прессалул давриву хьхьичIунсса чIава журналистътуран ванал бахшишругу дуллунни.
Аьрасатнал Журналистътурал союзрал Дагъусттаннал отделениялул хъунама, лазгиял кказитрал хъунама редактор МахIаммад Ибрагьимовлул кIицI ларгунни ниттил мазру ябаврил ва гьаз баврил агьамшиву. «Зу чара бакъа ниттил мазурдийгу чичлансса хIарачат буллан аьркинссару, зулла культура ва ляличIишиву яданшиврул», – увкунни ванал.
Ахирданий барчаллагь увкунни «Орлёнок-Дагестан» кказитрал хъунмур редактор Басират Илиясовахь, слёт ххуйсса даражалий тIайла дуккансса хIарачатрахлу.
ПатIимат Рамазанова
