Къиримнавун АхIмад-Хан Султаннул юбилейрай гьуртту хьун лавгссия 1-мур ЦIувкIуллал шяравасса чиваркIуннал группагу. Вай циняв Москавлив яхъанахъисса бур.
Телефондалувух укун бувсунни группалул хъунама Шарип Сайдуевлул:
— Жу, ххюя цIувкIрачу, лавгссияв тихун: на, АхIмад-Хан Султаннун цIасса Абакаров АхIмад-Хан, Илдаров КьурбанмахIаммад, уссурвал Спартак ва Саэд Сайдуевхъул. Гьанумур мурад бия Симферополлай АхIмад-Хан Султаннун цIусса гьайкал тIитIлатIисса шадлугърай гьуртту хьунсса. Дагъусттанная бувкIсса делегациялущал гьуртту хьуру му иширавух. Жула СалихI Сагидовгу ия делегациялуву. Жу бивру Алупкалийнгу, тиккусса гьайкалданучIагу тIутIив дишарду, бувхру АхIмад-Ханнул музейравунгу. ЦIувххуну, мунал нину- ппу чув бувччуну буссарив кIул бувну, бивру ниттил ва буттал гьаттайнгу. Тиччавасса шама маллагу хIалану, кьулгьу- кьурангу бувккуну, жулла дувайсса аьдат дуварду.
Жу Къиримнавун лавгру Москавливсса «Баттерфляй» кондитер фабрикалул гендиректор, уздансса цIувкIрачу Абакаров Рамазаннул ка-кумаграцIух. Ва цувагу АхIмад-Хан Султаннул маччачури, ванал буттал нину Забидат АхIмад-Ханнул ссурахъур. Цащава гьан къахъанай буну тIий, ванал Виричунан цIа дирзсса уссу АхIмад-Хангу, жугу тIайла бувккунну.
Къиримнал Миллатирттал иширтталсса буллалисса паччахIлугърал комитетрал ттуйнгу оьвкуна (кказитрай ва социал сетирдай АхIмад- Хан Султаннул оьрмулия чIявуну чичлачисса журналист хIисаврай) Къиримнавун, ххуллухсса багьагу, гьантта бикIансса гостиницалухсса хIакьгу буллай бия. Дагъусттаннайгу, хасну буттал шяраву ЦIувкIравгу, юбилейрацIун дархIусса мероприятияртту дуллай бунавхьур, вайгу кьариртун, тихун гьан къахъанай кIихIуллану ливчIунав. ЦIувкIрачунал арснал гьаттай Къиримнаву цIувкIул гьуртту шаву — мугу Виричунал цIанил хIурмат жучIава бюхттулну бушиву ккаккангу буллалисса, Къиримнал агьулданущалсса дусшиврийсса арардугу цIакь дуллалисса давур. БакIрайн дагьунни ттун Алупкалийсса музейраву Сайдуев Спартаклул тайннал телевидениялухьхьун интервью дуллалисса видеогу.
