Сентябрьданул 7-нний жу хьунабавкьуру Лакрал райондалул территориялул бувчIавурттал комиссиялул председатель Илияс ХIажиевлущал. Ванал бувсунни райондалий АьФ-лул Госдумалувунсса ва ДР-лул Халкьуннал Мажлисравунсса депутатътурал бувчIавурттайн хIадур шаврил хIакъираву.

Ванал бусаврийну, цIанасса ппурттуву Лакрал райондалул территориялул бувчIавурттал округрай най дусса дур бувчIавурттайн хIадур шаврин хасъсса давуртту.
Лакрал райондалий дур 24 бувчIавурттал участок: 20-райондалий, 4 – къутаннай. Циняв бувчIавурттал участокирттай бур ххюра шинайн бувчIусса ххю-ххюя комиссиялул член. Ми циняв цIана зий бур цала-цала участокирттай. УИК-рал информациялул 50 зузала(обходчик) инсантурал къатравух занай, буслай бивкIссар бувчIавурттая, кIул бувссар партиярттал вакилтуращал, миннахь бивкIссар бувчIавурттал хIакъиравусса, кандидатътурал суратирттащалсса буклетру.
БувчIавуртту дайдишин шанма гьантта ливчIсса чIумал, гьарца участокрайн ларсун бучIантIиссар наблюдательтурал сияхIру гьарца партиялул чулуха. Ми ялув бацIантIиссар бувчIавурттал чIумал участокрай закондалуцIун къадаркьусса тIуллу къадулланшиврул.

Бивру жу мукунма Ккуллал райондалийнгу. Ваччав жу ихтилат бувурду бувчIавурттал территориялул комиссиялул председатель МахIаммада АхIмадовлущал.
Ванал тIимунийну, райондалий дур 14 бувчIавурттал участок. БувчIавурттайн аьркинсса цимурцаннул дузалну бур, ток лещарча, генераторду хIадурну бур. Наблюдательтал хIадур буллай бур жяматийсса палаталул ва партиярттал, шанма гьантлул хьхьичI ми бучIан тIий бур участокирттайн. БувчIавурттавух гьуртту хьунтIий бур мукунма волонтерталгу.
Вай гьантрай зий бивкIссар УИК-рал информациялул зузалт (обходчиктал), миннал, циняв къатравух занай, буслай бивкIссар депутатъшиврийнсса кандидатътурая, чIурду булаврил журардая, чIурду буллуминнайх бачIлай бивкIссар бувчIавурттая бусласисса буклетру. ЧIурду буллалиминнал сияхIру дучIан тIий дур вай гьантрай. Комиссиялул члентал цала-цала кIанттурдай зий бур.
БувчIавурттал участокирттай дузал дурну дур видеонаблюдение, онлайн трансляция дикIан тIий дур ТИК-рал бувчIавурттал участокирттащал.
Гьаннайсса, Лакрал ва Ккуллал районну хIадурну дур бувчIавурттайн.
ХI.Аьдилов