Июньдалул 18-нний «Дагестан» РИА-лий хьунни бувчIавурттал ялув бацIаврил (по наблюдению за выборами) региондалул жяматийсса штабрал каялувчи Динислам Дадаевлул ва штабрал экспертътурал комиссиялул бакIчи Эдуард Уразаевлул пресс-конференция.
Спикертурал бусаврийну, сентябрьданул 20-нний дайдихьлай дур Цасса бувчIавурттал кьини. Ва кьини бувчIинтIий бур ПаччахIлугърал Думалувунсса ва Халкьуннал Мажлисравунсса депутатътал, мукунна хьунтIий дур муниципал даражалул бувчIавурттугу.
БувчIавуртту хьунтIий дур шанна кьинилул мутталий – сентябрьданул 18-нний, 19-нний ва 20-нний. ЦIанасса ппурттуву хIадур хъанай байбивхьуну бур бувчIавурттайн.
БувчIавурттайн хIадур шаврил лагрулий жяматийсса штабрал агьаммур давуну хъанай дур бувчIавурттал компаниярттал системалийнусса мониторинг дуллалаву, бувчIавурттал ялувбацIултрал даву дачин дуван лахьхьин баву, бувчIавурттал иширттая агьалинахь бусласаву. Сакин дурну дур бувчIавурттал ялув бацIулт бувчIавурттайн хIадур баврил даву, хIадур антIий ур 4300 бувчIавурттал ялув ацIу. Штабрал даву цIу дуккан даву, мукунна ДР-лул Жяматийсса палаталулгу, жяматийсса ккуранналгу, коммерциялул дакъасса сакиншиннардалгу, политикийсса партиярттал региондалийсса отделенияртталгу дянив уртакьну зузаврил хIакъиравусса кьутIи чичавугу хъанахъиссар граждан общество цачIун даврил чулухунмайсса хъунмасса ша.
ЧIурду булаврил кьинирдай контрольданул ца агьамсса бутIану хъанай бур Жяматийсса бувчIавурттал ялув бацIаврил центр (ЦОН), ва дузал бантIий бур Ростелекомрал площадкалий. Центрданул щаллу дувантIиссар гьантлул мутталийсса чIурду булаву нанаврил ва участокирттал даврил видеомониторинг, центрданул зузалт анаварсса мутталий хIала буххантIиссар диялдакъашивуртту, къалмакъаллу хъанахъисса иширттавух.
Мукунна штабрал бувчIавурттал участокирттай сакин буллай бур экспертътурал группа. Ванил давривун бувцуну бур юристътал, политологтал ва социологтал. Вайннал дуллантIиссар бувчIавурттал процедурарттал правалул анализ, ххал дуллантIиссар агитациялул законну лиян даврил хIалкьазия, мукунна хIадур дуллантIиссар оператив аналитикалул справкартту ва рекомендацияртту.
ХI.Аьдилов
