Июньдалул 27-нний «Дагестан» РИА-лул редакциялий ххал бивгьунни чIурду булаврил Цасса кьинилул масъалартту. ДакIнин бутанну, гьашину сентябрьданул 14-нний щала республикалий сакин хьунтIий дур кIанттул цилакаялувшиврул 610 органдалувунсса бувчIавуртту даврил кампания.
Журналистътуращал хьунабавкьунни БувчIавурттал ялув бацIаврил жяматийсса штабрал каялувчи Руслан Луговой ва Штабрал член Эдуард Уразаев.
Руслан Луговойл тIимунийну, бувчIавуртту хьунтIий дур 6 шагьрулул округрай: МахIачкъалалив, Буйнакскалий, Дагестанские Огнилий, Каспийскалий, Къизлардай ва Южно-Сухокумскалий, мукунна 38 муниципал райондалий. Миннуяр ххишала, бувчIинтIий бур 22 шяраваллил администрациялул бакIчиталгу.
Ялун нанисса бувчIавурттай избирательтурал сияхIирттавун ласунтIий дур сайки ца миллион ва 300 азара инсаннал цIа. Эдуард Уразаевлул мукунма бувсунни мониторингирттал ва экспертътурал группардал ва инсантуращалсса информациялул давурттал хIакъиравугу.
«БувчIавурттал ялув бацIаврил жяматийсса штабрал бур цила юристътурал группа, бувчIавурттай ва группагу зунтIиссар юридийсса масъаларттаха. Буссар бувчIавурттал ялув бацIайми хIадур байсса ва миннал даву саргъун дайсса группа. Ми цинярда давуртту цачIу дуллай, захIматсса масъалартту хIасул хьун къабитанну», – кунни спикертурал.
