Къуртал хьунни бувчIа­вуртту. Утти бучIир учин, гьашинусса бувчIавуртту паракьатсса тагьарданий хьу­ссар куну. ЛичIину ваца чялав багьансса иш хьунссар тIийгу цучIав акъая. БувчIавурттал хIасиллугу хьунни экспертътурал тIий бивкIсса куннасса.

«Жула республикалий бувчIавуртту хьунни паракьатса тагьарданий, саргъунсса сакиншиндарай», – увкунни Дагъусттаннал бакIчинал кIанайсса Федор Щукиннул Новости РИА-лул «Ночь выборов. Госдума 2026» тIисса Щалагу ­Аьрасатнал онлайн-марафондалул эфирданий.
Ванал бусаврийну, чIурду булун бувкIун бур сайки 87 % агьалинал. Ахир хIасиллу дуван тIий бур сентябрьданул 25-нний.
ПаччахIлугърал Думалувунсса депутатътурал бувчIавурттал цIубутIуйсса (предварительные) хIасиллу сентябрьданул 21-нний, билаятрал ЦИК-райн дуллусса ккаккиярттайну укунсса хьуну дур: «Единая Россия» партиялухлу буллуну бур 57,96% чIурдал, КПРФ –13,67%, ЛДПР – 8,96%, «Новые люди» – 7,91%, «Справедливая Россия» – 5,1%. ЛирчIми партиярттахлу буллуну бур 0,35% тIайла хьуну (партия прямой демократии), 1,97% бияннин (партия пенсионеров).
Дагъусттанная цала-цала кандидатътал Госдумалувун ккаккан бувсса 10 партиялува «Единая Россиялухлу» чIурду буллуну бур 92% инсантурал, «Справедливая Россиялухлу» – 2,62% дагъусттанлувтурал, КПРФ-лухлу – 2,25%, ЛДПР-данухлу – 1,45%. ЛирчIми партиярдахлу дагъустталувтурал къабуллуну бур цавагу процент чIурдал.
Госдумалувун депутатътал бувчIлай бивкIссар ца мандатрайнусса округирттайхчингу. ЦИК-рал ккаккиярттайн бувну, МахIачкъалаллал 10-мур округрай ххув хьуну ур СВО-лул гьурттучи, «Время героев» кадрардал программалул гьурттучи, ДР-лул цIуллушиву дуруччаврил министрнал хъиривчу МахIаммад Валихов. Ванахлу чIурду буллуну бур 82,37% инсантурал. КIилчинмур кIанай ур «Справедливая Россия» партиялул чулухасса кандидат Мурат Пайзуллаев – 4,68% чIурдал. Шамилчинмур кIанай ур КПРФ-лул вакил Мурзадин Авезов – 4,39% чIурдал.
Буйнакскаллал 11-мур округрай ххув хьуну ур Госдумалул депутат НурбахIанд НурбахIандов, ванахлу чIурду буллуну бур 85,53% агьалинал. КIилчинмур кIанай ур КПРФ-лул чулухасса кандидат МахIаммад МахIаммадов – 6% чIурдал. Шамилчинмур кIанай ур «Справедливая Россия» партиялул вакил Камил Давдиев, ванахлу буллуну бур 5,58% чIурдал.
Дарбантуллал райондалий 12-мур округрай цалчинмур кIанай ур «Единая Россия» партиялул вакил, Госдумалул депутат Хизри Абакаров, ванахлу чIурду буллуну бур 89,8% агьалинал. КIилчинмур кIанай ур КПРФ-лул чулухасса кандидат МахIмуд МахIмудов – 4,95% чIурдал. Шамилчинмур кIанай ур «Справедливая Россия» партиялул кандидат Марат Аьлияров – 2,5% чIурдал.
ДР-лул Халкьуннал Мажлисравунсса депутатътурал бувчIавурттавугу цалчинмур кIанай дур «Единая Россия» партия, ванихлу чIурду буллуну бур 74% агьалинал. Республикалул парламентравун бувххун бур мукунма «Справедливая Россиялул» вакилтал 11,99% чIурдащал. Шамилчинмур кIанай дур КПРФ –10,99% чIурдал, ЛДПР- далухлу буллуну бур 1,66 % чIурдал ва «Новые люди» партиялухлу – 1,06% чIурдал.
Уттигу цал тикрал банну, вай дур цIубутIуй дурсса (предварительные) хIасиллу, мунияту ахир хIасиллу бюхъай чан-кьансса даххана хьунгу. Амма, аьмну ларсун, ккалли дансса дахханашивуртту къахьуншиву чIалай дур.